मुंबईत राष्ट्रवादी ३५ जागा लढणार
सकाळ वृत्तसेवा
मुंबई, ता. ११ : राष्ट्रवादी काॅँग्रेस (शरदचंद्र पवार) पक्ष मुंबईत ३५ जागा लढविणार असल्याची माहिती राष्ट्रवादी काॅँग्रेसच्या मुंबईच्या अध्यक्षा राखी जाधव यांनी दिली. मुंबई महापालिका निवडणुकीत आघाडीबाबत अद्याप निर्णय झाला नसून वरिष्ठ पातळीवरच त्याबाबतचा निर्णय घेण्यात येईल, असेही त्यांनी सांगितले.

मुंबईत २०१७मध्ये झालेल्या निवडणुकीत राष्ट्रवादी काॅँग्रेसने नऊ जागा जिंकल्या होत्या. आता राष्ट्रवादी काॅँग्रेसमध्ये फूट पडली आहे. राष्ट्रवादी काॅँग्रेसचा अजित पवार गट वेगळा झाला आहे; मात्र पक्ष विभागल्यानंतर मूळ राष्ट्रवादी पक्षाचे मुंबईतील पदाधिकारी शरद पवार यांच्यासोबत आहेत. नव्या समाजघटकांना जोडण्याचे प्रयत्न काही महिन्यांपासून सुरू आहेत. त्यात पक्षाला यश येत असल्याची माहिती मुंबई राष्‍ट्रवादी काॅँग्रेसच्या अध्यक्षा जाधव यांनी दिली.

विधानसभा आणि लोकसभा निवडणुका आम्ही महाविकास आघाडी म्हणून लढविल्या. त्या निवडणुकांमध्ये आम्हाला फायदा झाला. मुंबई महापालिका निवडणुकीत कोणत्या पक्षाबरोबर आघाडी करायची, याबाबत निर्णय पक्षश्रेष्ठी घेतील. स्वबळाची तयारीही आम्ही केली आहे, असेही त्या म्हणाल्या.
------------