ठाणे खंडणी विरोधी पथकाकडून दोघांना अटक
ठाणे, ता. ११ : एमडी (मेफेड्रोन) हा अमली पदार्थ विक्री करण्यासाठी आलेल्या आकिब इकबाल बागवान (३३) याला १०८.८ ग्रॅम वजनाच्या मुद्देमालासह ठाणे खंडणी विरोधी पथकाने जेरबंद केले. याचदरम्यान त्याच्याकडे एक देशी बनावटीची पिस्टल मिळाली. त्याला ती पिस्टल विक्री करणाऱ्या भरत शत्रुध्न यादव यालाही एका जिवंत कडतुसासह अटक करण्यात आली. त्या दोघांकडून ११ लाख ४१ हजारांचा मुद्देमाल जप्त करण्यात आला आहे. बागवान हा सराईत गुन्हेगार असून, त्याच्यावर मानपाडा आणि बाजारपेठ पोलिस ठाण्यात गुन्हा दाखल आहे. या गुन्ह्याचा पुढील तपास खंडणी विरोधी पथकाचे सहाय्यक पोलिस निरीक्षक सुनील तारमळे करत आहेत.