बाबा सिद्दीकी हत्या प्रकरण
झीशानची सुरक्षा कमी करण्यामागे काही गैरहेतू
न्यायालयाने उपस्थित केले प्रश्नचिन्ह

सकाळ वृत्तसेवा,
मुंबई, ता. ११ : दिवंगत काँग्रेस नेते आणि माजी आमदार बाबा सिद्दीकी यांचा मुलगा झीशान सिद्दीकी यांची सुरक्षा कमी करण्यामागे काही गैरहेतू असल्याचे उच्च न्यायालयाने गुरुवारी (ता. ११) निरीक्षण नोंदवले.
सिद्दीकी यांच्या हत्येनंतर, झीशाननेही अर्ज केल्यानंतर त्याला पोलिस सुरक्षा पुरवण्यात आली. तथापि, याचिका दाखल झाल्यानंतर पोलिसांनी सुरक्षा कमी केल्याची माहिती वकील प्रदीप घरत यांनी न्या. अजय गडकरी आणि न्या. रणजित भोसले यांच्या खंडपीठाला सांगितली. झिशानची सुरक्षा कमी करण्याचा निर्णय घेतलेल्या समितीच्या बैठकीचे इतिवृत्त न्यायालयात सादर करण्याचे आदेश न्यायालयाने दिले.
दुपारच्या सत्रात सरकारी वकील मनकुंवर देशमुख यांनी खंडपीठासमोर एक पोलिसांचा संभाव्य धोका मूल्यांकन अहवाल सादर केला. त्यानुसार, एखाद्या व्यक्तीला पोलिस सुरक्षा पुरवणे, कमी करणे, काढणे याबाबत निर्णय घेतला जातो. तसेच त्यांनी याचिका दाखल झाल्यानंतर सुरक्षा कमी केल्याच्या आरोपाचेही खंडन केले. सुरक्षा पुरविण्याच्या प्रक्रियेला दोन-तीन महिने लागू शकतात. कधीकधी एका दिवसातही निर्णय घेतला जातो, असेही देशमुख यांनी सांगितले.
सुरक्षा कमी करण्याचा निर्णय घेतलेल्या बैठकीचे इतिवृत्त आम्हाला दाखवा. कोणताही धोका नाही, असा निष्कर्ष कुठे आहे? सुरक्षा कमी करण्यासाठी दिलेले कारण आम्हाला दाखवा, अशी प्रश्नांची सरबत्तीच खंडपीठाने केली. वरवर पाहता यात गैरहेतू दिसून येतो. झीशानप्रकरणी धोक्याची कोणतीही शक्यता तपासलेली असेल, तर आम्हाला दाखवा, असे खंडपीठाने पुढे स्पष्ट केले आणि प्रकरणाची गुंतागुंत लक्षात घेता, महाधिवक्त्यांना पुढील सुनावणीला हजर राहण्याचे आदेश देऊन न्यायालयाने सुनावणी तहकूब केली.
------------
काय प्रकरण?
बाबा सिद्दीकी यांची १२ ऑक्टोबर २०२४ रोजी रात्री वांद्रे (पूर्व) येथील त्यांचा मुलगा झीशानच्या कार्यालयाबाहेर तीन हल्लेखोरांनी गोळ्या घालून हत्या केली होती. त्यांच्या हत्येचा तपास स्वतंत्र आणि निष्पक्ष तपास यंत्रणेमार्फत करण्यात यावा, अशी मागणी त्यांची पत्नी शेहझीन झियाउद्दीन सिद्दीकी यांनी याचिकेतून केली आहे.