अंबरनाथमध्ये कमळच फुलणार ः मनोज तिवारी
अंबरनाथ, ता. १२ (वार्ताहर) ः शहरात प्रचंड भ्रष्टाचार झाला आहे. जनतेला लुटले आहे. तर नागरिकांचे मत हाच खरा ईडी आणि हेच मत अंबरनाथमध्ये परिवर्तन घडवणार आहे. अंबरनाथमध्ये सत्ता पालट होऊन कमळच फुलणार, असा ठाम विश्वास भोजपुरी अभिनेता आणि भाजपनेते मनोज तिवारी यांनी परिवर्तन रॅलीत व्यक्त केला.
शुक्रवारी (ता. १२) परिवर्तन रॅलीचे आयोजन करण्यात आले होते. अंबरनाथ पश्चिमेतील बुवापाडा ते सर्वोदयनगर या परिसरात, प्रभाग क्रमांक चारचे उमेदवार मीना वाळेकर, पवन वाळेकर, मिनू रवींद्र सिंग तसेच पाचचे उमेदवार प्रजेश तेलंगे व ऊर्मिला सुरेंद्र यादव आणि नगराध्यक्षपदाच्या दावेदार तेजश्री करंजुळे-पाटील यांच्या प्रचारार्थ रॅली काढण्यात आली. या रॅलीत मोठ्या संख्येने नागरिक सहभागी झाले.