विशेष गटाच्या मयुरेशला राज्यस्तरीय
पॅराऑलिंपिकमध्ये दुहेरी सुवर्णपदक
ठाणे शहर, ता. १३ (बातमीदार) ः ठाण्याचा २५ वर्षीय विशेष खेळाडू मयुरेश कोटियन याने राज्यस्तरीय पॅराऑलिम्पिक स्पर्धेत सुवर्णपदक जिंकून ‘विशेष मूल काही करू शकत नाही’ हा समाजातील गैरसमज दूर केला आहे. पुणे आणि कोल्हापूर येथे झालेल्या या स्पर्धेत मयुरेशने भाग घेतला. त्याने १०० मीटर रिंगिंग आणि लाँग जम्प या दोन्ही प्रकारांत सुवर्णपदक पटकावून दमदार कामगिरी केली.
वाघबीळ येथे राहणाऱ्या मयुरेशला त्याच्या कोटियन कुटुंबाने लहानपणापासूनच धावण्याच्या क्षमतेला प्रोत्साहन दिले. नोशिओ इन्स्टिट्यूटचे कार्यकारी सचिव योगेंद्र शेट्टी, शिक्षक राजेंद्र जगताप आणि प्रशिक्षक दत्ता चव्हाण यांचे त्याला मोलाचे मार्गदर्शन लाभले. मयुरेशच्या या यशामुळे त्याच्यातील विशेष असणाऱ्या व्याधीवर त्याने मिळवलेला विजय अधोरेखित झाला आहे.