कासा शासकीय विश्रामगृहाची दुरुस्ती पूर्ण
नागरिकांच्या सेवेत सुरू होण्यास विलंब
कासा, ता. १५ (बातमीदार) : डहाणू तालुक्यातील मध्यवर्ती ठिकाणी असलेल्या कासा येथील शासकीय विश्रामगृहाची दीर्घकाळ प्रलंबित असलेली दुरुस्ती अखेर पूर्ण झाली आहे. सार्वजनिक बांधकाम विभागाने सुमारे एक कोटी रुपयांचा निधी वापरून हे काम पूर्ण केले असले तरी, सर्व सुविधा अद्ययावत झाल्यानंतरही हे विश्रामगृह अद्याप नागरिकांच्या व अधिकाऱ्यांच्या सेवेत खुले झालेले नाही. त्यामुळे स्थानिक नागरिकांमध्ये तीव्र नाराजी व्यक्त होत आहे.
अनेक वर्षांपासून नादुरुस्त अवस्थेत बंद असलेल्या या विश्रामगृहामुळे स्थानिक नागरिकांसह बाहेरून येणाऱ्या शासकीय अधिकाऱ्यांची मोठी गैरसोय होत होती. सार्वजनिक बांधकाम विभागाने या दुरुस्तीच्या कामाला गती दिली. दुरुस्तीच्या टप्प्यात भिंती, दरवाजे, खिडक्या, फर्निचर, पाणीपुरवठा व वीज व्यवस्था सुधारण्यात आली आहे. तसेच अंतर्गत सजावट व आवश्यक सुविधा अद्ययावत करण्यात आल्या आहेत. विश्रामगृहाभोवती संरक्षक भिंत उभारण्यात आली असून, मुख्य गेटही नव्याने बांधले गेले आहे. पिण्याच्या पाण्याची सोय, शौचालयांची दुरवस्था आणि छतावरील पत्र्यांची समस्या यांसारख्या पूर्वीच्या सर्व त्रुटी आता दूर झाल्या आहेत.
दरम्‍यान, मध्यवर्ती भागात असलेले हे विश्रामगृह सार्वजनिक बांधकाम विभागाने सुधारून वापरण्यायोग्य केले आहे. दुरुस्तीची मागणी आम्ही अनेक वर्षांपासून करत होतो. काम पूर्ण झाले असून, आता हे विश्रामगृह नागरिकांच्या सेवेत खुले करावे, अशी मागणी कासा सेवानिवृत्त संघचे अध्यक्ष हेमंत धानमेर यांनी केली आहे.
------------------
दिरंगाईमुळे गैरसोय
कासा हे ठिकाण मुंबई-अहमदाबाद राष्ट्रीय महामार्गावर वसलेले आहे. धामणी, कवडास धरणे, महालक्ष्मी मंदिर, डहाणू समुद्रकिनारा, जव्हार तसेच दमन व शेलवास यांसारख्या पर्यटनस्थळांच्या मध्यवर्ती भागात असल्याने येथे येणाऱ्यांची संख्या मोठी असते. त्यामुळे मध्यवर्ती भागात सुसज्ज शासकीय विश्रामगृह असणे अत्यंत आवश्यक आहे. दुरुस्तीची सर्व कामे पूर्ण होऊनही विश्रामगृह वापरास सुरुवात न झाल्याने ‘हे विश्रामगृह नेमके केव्हा सुरू होणार,’ असा प्रश्न नागरिक उपस्थित करत आहेत. दुरुस्ती पूर्ण झाल्यानंतर विश्रामगृह तातडीने नागरिकांच्या व अधिकाऱ्यांच्या सेवेत खुले करण्याची मागणी विविध स्तरांतून जोर धरू लागली आहे.
------------------
गेल्या अनेक वर्षांपासून कासा येथील विश्रामगृह बंद होते. आता ते पूर्णपणे अद्ययावत करण्यात आले आहे. कंपाउंड व नवीन गेटचे कामही पूर्ण झाले आहे; मात्र देखभाल व सुरक्षाासाठी पहारेकरी उपलब्ध नसल्याने ते अद्याप सुरू करता आलेले नाही. कर्मचारी नेमणुकीसाठी शासनाकडे पत्रव्यवहार सुरू आहे.
- नितीन पगारे, उपकार्यकारी अभियंता, सार्वजनिक बांधकाम विभाग, डहाणू.
------------------
आजूबाजूच्या २० ते २५ किलोमीटर परिसरात शासकीय विश्रामगृह नाही. मुंबई-अहमदाबाद महामार्ग तसेच डहाणू-नाशिक मार्ग जवळून जात असल्याने येथे अद्ययावत विश्रामगृहाची नितांत गरज आहे. दुरुस्ती पूर्ण झाली असेल, तर ते तातडीने सुरू करावे.
- हरेश मुकणे, उपसरपंच, कासा.