कळव्यात अद्ययावत क्रीडा संकुल
४० कोटींचा खर्च, लवकरच कामाला सुरुवात
सकाळ वृत्तसेवा
ठाणे, ता. १५ : ऑलिंपिक झेप घेऊ पाहणाऱ्या कळव्यातील खेळाडूंना आता शहरातच सर्व सोयीसुविधांनी युक्त असे अद्ययावत क्रीडा संकुल मिळणार आहे. येथील यशवंत रामा तरण तलावाच्या नूतनीकरणासोबतच शेजारी असलेल्या भूखंडावर हे क्रीडा संकुल बांधण्यात येणार आहे. खासदार डॉ. श्रीकांत शिंदे यांच्या प्रयत्नाने त्यासाठी ४० कोटींचा निधी मंजूर झाला असून, लवकरच प्रत्यक्ष कामाला सुरुवात होणार आहे.

ठाणे महापालिकेच्या कळवा येथील मनीषानगर भागात यशवंत रामा तरण तलाव आहे. या तरण तलावाची उभारणी महापालिकेने १९९१ मध्ये केली होती. या ठिकाणी तळ अधिक एक मजली इमारत आहे. या इमारतीच्या बांधकामास ३३ वर्षे पूर्ण झाली आहेत. या तरण तलावाचा वापर कळवा, खारेगाव, ठाणे परिसरातील नागरिकांकडून करण्यात येतो. तसेच या ठिकाणी राष्ट्रीय स्तरावरील स्पर्धाही आयोजित करण्यात येतात. कळवा येथील यशवंत रामा तरण तलावाच्या भूखंडाचे एकूण क्षेत्र ४२७० चौ.मी. इतके आहे. जागेवरील जुनी वास्तू पाडून त्या ठिकाणी नवीन वास्तू उभारली जाणार आहे. त्यात तरण तलावासोबतच बहुउद्देशीय क्रीडा संकुलाची वास्तू उभारली जाणार आहे. या अत्याधुनिक तरण तलावाच्या उभारणीनंतर या ठिकाणी विविध राज्यस्तरीय आणि राष्ट्रीय स्तरावरील पोहोचण्याच्या स्पर्धांचे आयोजनदेखील होईल, असा विश्वास खासदार डॉ. श्रीकांत शिंदे यांनी व्यक्त केला आहे.

क्रीडा संकुलाची वैशिष्ट्ये
बहुउद्देशीय क्रीडा संकुलाच्या इमारतीमध्ये सुमारे १५० दुचाकी आणि ५० हून अधिक चारचाकी पार्क होतील, अशी पार्किंग व्यवस्था असणार आहे, तर या ठिकाणी कार लिफ्टिंगचीदेखील सुविधा असणार आहे. याचसमवेत प्रशस्त अशी लॉबी, कार्यालय असणार आहे, तर २७५ लोकांची आसन व्यवस्था असलेला बँक्वेट हॉल, प्री फंक्शन एरिया, कॅफेटेरिया, खेळाडूंसाठी चेंजिंग रूम, स्वतंत्र स्वच्छतागृहे यांची उभारणी होणार आहे.

या खेळांचा समावेश
क्रीडा संकुलात टेबल टेनिस, जिम, योगा, बुद्धिबळ, चेस, कॅरम, बॅडमिंटन, मार्शल आर्ट्स, पीकल बॉल, बास्केट बॉल, स्केटिंग, कबड्डी, बॉक्स क्रिकेट, पॅडल बॉल कोर्ट आणि इतर इंडोर खेळांची सुविधा असणार आहे, तर या सर्व ठिकाणी प्रेक्षकांसाठी बसण्याची उत्तम आसन व्यवस्थादेखील असणार आहे. यामुळे संपूर्ण जिल्ह्यातील खेळाडूंना विविध खेळांच्या सरावासाठी अत्याधुनिक सुविधांनी आणि साहित्यांनी सुसज्ज असे हक्काचे क्रीडा संकुल उपलब्ध होणार आहे.
.............................