चारकोपमधील नागदेवता उद्यान अंधारात
दिव्यांची संख्या वाढवण्याची ज्येष्ठ नागरिकांची मागणी

कांदिवली, ता. १५ (बातमीदार) : चारकोप सेक्टर ३ येथील नागदेवता ओंकारेश्वर मनोरंजन उद्यानात असलेले विजेचे दिवे अंधुक प्रकाश देत असल्याने रात्रीच्या वेळी महिला व ज्येष्ठ नागरिकांना चालणे किंवा योगा करणे अडचणीचे ठरत आहे. त्यामुळे उद्यानात जास्त प्रकाश देणारे दिवे लावावेत किंवा दिव्यांची संख्या वाढवावी, अशी मागणी येथील नागरिक करत आहेत.
कांदिवली आणि बोरिवली पश्चिमेकडे म्हाडाची मोठी वसाहत आहे. प्रत्येक सेक्टरमध्ये म्हाडा व्यवस्थापनाने मैदान आणि उद्यान उपलब्ध करून दिले आहेत. सेक्टर ३ येथील नागदेवता ओंकारेश्वर मनोरंजन उद्यानाचा माजी नगरसेविका संध्या विपुल दोशी यांनी कायापालट केला. संगीतातील वाद्याच्या जसे हार्मोनियम, तबला, बासरी, वीणा आदींच्या हुबेहूब प्रतिकृती या उद्यानात साकारल्या आहेत. जॉगिंग ट्रॅक आणि विविध शोभेच्या झाडांमुळे हे उद्यान नागरिकांच्या पसंतीचे ठरत आहे. परिसरातील नागरिक मोठ्या संख्येने या मनोरंजन उद्यानात योगा करणे, चालणे यासाठी येतात. उद्यानात ज्येष्ठ नागरिक कट्टासुद्धा आहे. आठवडाभरापासून उद्यानातील मध्यभागी परिसरातील आणि जॉगिंग ट्रॅकवरील दिवे कमी प्रकाश देत असल्याने येथे अंधार पसरला आहे. त्यामुळे चालणे, योगा करणे असे व्यायाम करताना नागरिकांना अडचणीचे ठरत आहे.
पालिकेच्या उद्यान विभागाने या उद्यानात जास्त प्रकाश देणारे तीन दिवे लावले आहेत, मात्र उद्यानाचा परिसर मोठा असल्याने विद्युत दिव्यांची कमतरता जाणवते.

नागदेवता ओंकारेश्वर मनोरंजन उद्यान हे परिसरातील नागरिकांसाठी देणगी आहे. मोठा परिसर, विविध झाडे आणि मोठा जॉगिंग ट्रॅक यामुळे सामान्य नागरिकांसह ज्येष्ठ नागरिक येथे मोठ्या प्रमाणात येतात, मात्र दिव्यांची कमतरता असल्याने रात्रीच्या सुमारास उद्यानात येणे ज्येष्ठांसाठी अडचणीचे ठरत आहे.
- विक्रम वंडेकर, ज्येष्ठ नागरिक, चारकोप

उद्यानात जास्त प्रकाश देणारे तीन दिवे लावले आहेत. काळोख, अंधुक प्रकाश असेल, तर लवकरच संबंधितांना माहिती देऊन उद्यान प्रकाशमान करण्यात येईल.
- जनार्दन माने, उद्यान सहाय्यक अधीक्षक