निवडणुकीसाठी प्रशासन सज्ज
स्थगित पाच प्रभागांसाठी २० डिसेंबरला मतदान
बदलापूर, ता. १५ (बातमीदार)ः कुळगाव-बदलापूर नगरपालिकेच्या सार्वत्रिक निवडणूक २०२५ अंतर्गत २ डिसेंबरला बहुतांश प्रभागांमध्ये मतदान प्रक्रिया पार पडली होती; मात्र काही कारणांमुळे उर्वरित राहिलेल्या पाच प्रभागांतील जागांसाठी आता २० डिसेंबर २०२५ रोजी मतदान घेण्यात येणार आहे. यासाठी प्रशासनाने तयारी पूर्ण केली आहे. प्रभाग क्रमांक ५: ५-ब, प्रभाग क्रमांक ८: ८-अ, प्रभाग क्रमांक १०: १०-ब, प्रभाग क्रमांक १५: १५-ब, प्रभाग क्रमांक १७: १७-अ या संबंधित प्रभागांमध्ये सकाळी ७.३० ते सायंकाळी ५.३० या वेळेत शांततेत मतदान प्रक्रिया पार पडणार आहे.

एकूण ५६ केंद्रांवर मतदान होणार आहे. मतदानासाठी ७० ईव्हीएम मशीन ठेवण्यात येणार आहेत. निवडणुकीच्या दिवशी प्रत्यक्ष सेवा बजावणाऱ्या कर्मचाऱ्यांना यासंदर्भात उद्या (ता. १६) प्रशिक्षण देण्यात येणार आहे. मतदारांना कोणतीही गैरसोय होऊ नये यासाठी आवश्यक उपाययोजना करण्यात आल्या आहेत.

मतदारांसाठी विशेष सूचना
पालिकेचे मुख्याधिकारी मारुती गायकवाड यांनी मतदारांसाठी शाई लावण्याबाबत विशेष माहिती दिली आहे. २ डिसेंबरच्या मतदानात मतदारांना डाव्या हाताच्या तर्जनीवर शाई लावण्यात आली होती; मात्र २० डिसेंबर रोजी होणाऱ्या मतदानात या उर्वरित पाच प्रभागांतील मतदारांना डाव्या हाताच्या तर्जनीच्या शेजारील मधल्या बोटावर शाई लावण्यात येणार आहे.

प्रशासनाचे आवाहन
निवडणूक निर्णय अधिकारी विश्वास गुजर, सहाय्यक निवडणूक अधिकारी मारुती गायकवाड आणि अतिरिक्त सहाय्यक निवडणूक निर्णय अधिकारी अभिजीत देशमुख यांनी नागरिकांना जास्तीत जास्त संख्येने मतदान करण्याचे आवाहन केले आहे. लोकशाही अधिक सक्षम करण्यासाठी प्रत्येक मत महत्त्वाचे असून, नागरिकांनी मतदानाचा हक्क बजावून लोकशाही प्रक्रियेत सक्रिय सहभाग घ्यावा, असे आवाहन प्रशासनाने केले आहे. २ डिसेंबरच्या मतदानाच्या टक्केवारीवर आधारित, २० तारखेचे मतदान देखील होईल, असा आशावाद पालिका प्रशासनाकडून व्यक्त करण्यात आला आहे.