नवी मुंबई, ता. १५ (वार्ताहर) : सायबर चोरट्यांनी एका वैद्यकीय समाजसेविकेला टेलिग्रामद्वारे हंगामी नोकरीचे प्रलोभन दाखवून तिच्याकडून तब्बल १९ लाख ९४ हजार रुपये उकळून तिची फसवणूक केल्याची घटना उघडकीस आली आहे. नेरूळ पोलिसांनी सायबर चोरट्याविरोधात गुन्हा दाखल केला आहे.

४५ वर्षीय महिला घणसोली येथे राहण्यास असून, ती नेरूळ येथील एका रुग्णालयामध्ये वैद्यकीय समाजसेविका म्हणून कार्यरत आहे. १७ ऑक्टोबरला सायबर चोरट्यांनी महिलेचा टेलिग्राम ॲपवरील हदीजा नावाच्या ग्रुपमध्ये समावेश केला. पार्टटाइम जॉबद्वारे घरबसल्या पैसे मिळतील, अशा प्रकारचे मेसेज पाठवण्यात आले होते. ग्रुपमधील सूचनेनुसार महिलेने कृतिका मेहरा नावाच्या महिलेला संपर्क साधला असता, तिने यूट्युबवरील व्हिडिओ लाइक केल्यास प्रत्येक लाइकसाठी ५० रुपये मिळतील, असे सांगितले. त्यानुसार या महिलेने व्हिडिओ लाईक केल्यानंतर सुरुवातीला काही रक्कम तिच्या खात्यात जमा झाली. त्यामुळे तिचा यावर विश्वास बसला. त्यानंतर सायबर चोरट्यांनी टास्कच्या नावाखाली दोन हजार रुपये गुंतवणूक केल्यास तीन हजार रुपये परतावा मिळेल, असे प्रलोभन दाखवले. त्यातही सुरुवातीला थोडाफार परतावा देऊन पुढील टास्कसाठी रक्कम वाढवण्यास भाग पाडले. अखेर सायबर टोळीने क्रिफ्टो करन्सीच्या नावाखाली अधिक नफा मिळेल, असे सांगत या महिलेकडून एकूण १९ लाख ९४ लाख रुपये उकळले. यानंतर महिलेने पैसे परत मागितले असता, सायबर चोरट्यांनी कोणताही प्रतिसाद दिला नाही.