अवर्षणग्रस्त शेतकऱ्यांना मदतीचा हात
प्रताप सरनाईक यांच्याकडून १०१ देशी गाईंची भेट
भाईंदर, ता. १५ (बातमीदार) ः अतिवृष्टीने उद्ध्वस्त झालेल्या धाराशिव जिल्ह्यातील शेतकऱ्यांना मदतीचा हात म्हणून परिवहनमंत्री प्रताप सरनाईक यांनी स्वखर्चाने १०१ उत्तम प्रतींच्या गाईंचे वितरण केले आहे. मिरा रोड येथे कला महोत्सवादरम्यान रविवारी (ता. १४) सायंकाळी सद्गुरू सदानंद महाराज यांच्या हस्ते दूरदृश्य प्रणालीद्वारे वितरण पार पडले.
सप्टेंबरमध्ये झालेल्या मुसळधार पावसाने अनेक शेतकऱ्यांची शेती, उभी पिके आणि गोठ्यातील पशुधन अक्षरशः वाहून नेले. कष्टाच्या जीवावर उभे असलेले संसार एका क्षणात उद्ध्वस्त झाले. विशेषतः धाराशिव जिल्ह्यातील कळंब, भूम आणि परंडा तालुक्यांमध्ये अतिवृष्टीचा फटका बसल्याने शेतकऱ्यांनी शेतीबरोबरच कुटुंबाच्या उपजीविकेचा मुख्य आधार असलेली दूधदुभती जनावरे गमावली आहेत. या शेतकऱ्यांना मदत करण्यासाठी सरनाईक यांनी गुजरातमधील ‘गीर’ प्रजातीच्या उत्तम प्रतीच्या देशी गाईंची निवड केली. ७५ ते ८० हजारांच्या गाई महाराष्ट्रातील स्थानिक गाईंपेक्षा दुप्पट दूध देतात. या गाईंचे रविवारी सायंकाळी दूरदृश्य प्रणालीद्वारे वितरण करण्यात आले.
---------------------------------
आर्थिक आधार
देशी दुधाला चांगला दर मिळत असल्याने शेतकऱ्यांना नियमित उत्पन्नाचा स्रोत मिळेल, त्यांच्या कुटुंबाला भक्कम आर्थिक आधार प्राप्त होईल. या भागातील पशुधन गमावलेल्या शेतकरी कुटुंबांना स्वावलंबनाचा नवा मार्ग मिळावा, या हेतूने हे गाईंचे वितरण केल्याचे प्रताप सरनाईक यांनी सांगितले.