हत्या प्रकरणातील मुख्य आरोपीसह तिघांना अटक
डोंबिवली, ता. १५ ः डोंबिवली पोलिस ठाण्याच्या हद्दीत शनिवारी (ता. १३) रात्री साडेअकराच्या सुमारास कोपर रेल्वे स्थानकाच्या जवळील परिसरात जुन्या भांडणाच्या वादातून नरेंद्र ऊर्फ काल्या भालचंद्र जाधव (वय ३७) याची निर्घृण हत्या करण्यात आली होती. याप्रकरणी रामनगर पोलिसांनी खुनाचा त्वरित उलगडा करीत तिघांना अटक केली आहे. मुख्य आरोपी आकाश गौरी शंकर बिराजदार (२९) यासह दिवाकर महेशचंद्र गुप्ता (१८), आलिफ शहादाब खान (१८) अशी अटक आरोपींची नावे आहेत.
पोलिसांनी दिलेल्या माहितीनुसार आरोपींनी शिवीगाळ व धमक्या देत चाकू, कोयता व लोखंडी रॉडने डोके, मान, छाती व शरीरावर सुमारे ४० वार करून नरेंद्र यांना ठार मारले. हल्ला थांबवण्याचा प्रयत्न करणारे फिर्यादी शुभम राजेश पांडे (२७) यांच्यावरही चाकूने वार करून त्याला गंभीर जखमी करण्यात आले होते. याप्रकरणी डोंबिवली पोलिस ठाण्यात गुन्हा दाखल करण्यात आला होता. घटनेनंतर वरिष्ठ पोलिस अधिकाऱ्यांच्या मार्गदर्शनाखाली स्वतंत्र तपास पथक तयार केले. सीसीटीव्ही फुटेज व तांत्रिक तपासाच्या आधारे पोलिसांनी दिवा येथून आकाश याला अटक केली. तसेच त्याच्या दोघा साथीदारांनादेखील अटक केली. मुख्य आरोपी आकाश बिराजदार याने पूर्ववैमनस्यातून खून केल्याचे तपासात निष्पन्न झाले असून या गुन्ह्याचा अधिक तपास केला जात आहे.