भारताला चार जागतिक शक्तींशी सामना करावा लागणार
भारत-पाकिस्तान युद्धाची शक्यता; ॲड. प्रकाश आंबेडकर यांचे भाकीत

उल्हासनगर, ता. १५ (बातमीदार) : सध्याच्या जागतिक घडामोडी पाहता येत्या दोन-तीन महिन्यांत भारत-पाकिस्तान युद्धाची शक्यता आहे. तसे झाल्यास भारताला चार जागतिक शक्तींशी सामना करावा लागणार असल्याचे खळबळजनक भाकीत वंचित बहुजन आघाडीचे अध्यक्ष ॲड. प्रकाश आंबेडकर यांनी येथील जाहीर सभेत रविवारी (ता. १४) केले.

‘वंचित’चे ठाणे जिल्हाध्यक्ष मनोज पवार आणि प्रवक्ते सोनू पवार यांच्या पुढाकाराने सुभाष टेकडी येथील सिद्धार्थ स्नेह मंडळाच्या मैदानात या सभेचे आयोजन करण्यात आले होते. या वेळी प्रकाश आंबेडकर यांनी देशाच्या आंतरराष्ट्रीय परिस्थितीवर भाष्य करत हे भाकीत व्यक्त केले. ते म्हणाले की, ‘येत्या दोन ते तीन महिन्यांत भारत आणि पाकिस्तानदरम्यान युद्ध होण्याची शक्यता नाकारता येत नाही; मात्र सध्याच्या जागतिक राजकारणाची स्थिती लक्षात घेता हे युद्ध सोपे नसेल, आज पाकिस्तानला इंग्लंड, अमेरिका (डोनाल्ड ट्रम्प), रशियाचे अध्यक्ष पुतीन आणि चीन यांसारख्या शक्तिशाली देशांकडून शस्त्रसाठा मिळण्याची शक्यता आहे, जर युद्ध झाले, तर भारताला केवळ पाकिस्तानशी नाही, तर अप्रत्यक्षपणे चार जागतिक शक्तींशी सामना करावा लागू शकतो.’ त्यामुळे देशाच्या सुरक्षेच्या दृष्टीने सरकारने अधिक सावध आणि दूरदृष्टीने धोरण आखण्याची गरज असल्याचेही त्यांनी अधोरेखित केले.
..
विधानसभेत मत चोरी
प्रकाश आंबेडकर यांनी प्रतप्रधान नरेंद्र मोदी यांच्यावर या सभेत चौफेर टीका केली. महाराष्ट्र विधानसभेच्या निवडणुकीत मत चोरी झाली असून, मतदानाच्या दिवशी सायंकाळी ६ वाजल्यानंतर तब्बल ४६ लाख मतदान झाले. याबाबत एकत्रित आवाज उठविण्याचा सल्ला विरोधी पक्षांच्या नेत्यांना त्यांनी दिला. आम्ही निवडणूक आयोगाला याबाबत नियमावली मतदान रेकॉर्डची प्रत मागितली; मात्र आजपर्यंत आयोगाने ती दिली नसल्याचे त्यांनी सांगितले.