कमल पिचड यांच्याविरोधात गुन्हा दाखल
सकाळ वृत्तसेवा
ठाणे, ता. १५ : दिवंगत माजी आदिवासी मंत्री तथा ठाणे जिल्ह्याचे माजी पालकमंत्री मधुकर पिचड यांची पत्नी कमल (वय ६९) यांनी शासनाची फसवणूक केल्याची तक्रार पिचड यांची सून सरोज जितेंद्र पिचड यांनी केली आहे. त्या तक्रारीनुसार ठाणे नगर पोलिस ठाण्यात रविवारी (ता. १४) गुन्हा दाखल करण्यात आला आहे.

मुरबाड येथे राहणाऱ्या तक्रारदार सरोज जितेंद्र पिचड (वय ४२) यांनी दिलेल्या तक्रारीत, त्या दिवंगत माजी मंत्री पिचड यांचा लहान मुलगा दिवंगत जितेंद्र यांचा पत्नी आहेत. त्यांना आदिवासी शेतजमीन खरेदी करायची इच्छा त्यांनी भिवंडी येथे राहणाऱ्या त्यांच्या सावत्र सासू म्हणजे पिचड यांच्या दुसरी पत्नी कमल पिचड यांच्याजवळ व्यक्त केली होती. त्या व्यवहारासाठी त्यांनी त्यांना रोख रक्कम दिली. त्यानुसार मराठा समाजाच्या असूनदेखील कमल पिचड यांनी शहापूर येथे २००४ मध्ये दिवंगत कमळू रामा रेरा यांच्या मालकीची १३ हेक्टर १४ गुंठे शेतजमिनीच्या खरेदीसाठी हिंदु महादेव कोळी असा बनावट जातीचा दाखला ठाणे जिल्हाधिकारी कार्यालय येथे सादर केला. त्याआधारे सात हेक्टर २८ गुंठे आदिवासी जामीन खरेदी करून २०१७ मध्ये त्या खरेदी केलेल्या जमिनीपैकी काही भाग समृद्धी महामार्गासाठी शासनाला विकला. त्यातून पाच कोटी १४ लाख ९८ हजार ५२ रुपयांची रक्कम शासनाकडून स्वीकारून महाराष्ट्र शासनाची फसवणूक केल्याचे तक्रारीत नमूद करण्यात आले.