उल्हासनगर, ता. १५ (बातमीदार) : उल्हासनगर रेल्वे स्थानक परिसरात पूर्व व पश्चिम भागाला जोडणारा स्कायवॉक नागरिकांच्या सोयीसाठी उभारण्यात आला आहे. मात्र, हा स्कायवॉक सध्या नागरिकांसाठी असुरक्षित ठरत आहे. अश्लील चाळे तसेच नशेखोरांचा अड्डा बनत चालल्याच्या तक्रारी वारंवार समोर येत आहेत. अशातच चिलीममुळे स्कायवॉकखाली आग लागल्याची घटना उघडकीस आली आहे.
एमएमआरडीएने उभारलेला हा स्कायवॉक देखभालीअभावी जीर्णावस्थेत गेला आहे. सुरुवातीला परिस्थिती नियंत्रणात ठेवण्यासाठी ‘एक हात मदतीचा’ या सामाजिक संघटनेचे संस्थापक अध्यक्ष विजय कदम यांच्या प्रयत्नातून येथे पोलिस बंदोबस्त ठेवण्यात आला होता. तसेच एमएमआरडीएने स्कायवॉककडे दुर्लक्ष केल्याने विजय कदम यांच्या पाठपुराव्यामुळे तो स्कायवॉक महापालिकेकडे हस्तांतरित करण्यात आला; मात्र त्यानंतरही अवस्था जैसे थेच असल्याचे चित्र आहे.
दत्तात्रय व्यायामशाळेजवळ, कोयंडे यांच्या पुतळ्याच्या बाजूला असलेल्या स्कायवॉकच्या पायऱ्यांजवळील मोकळ्या पडीक जागेत नशेखोर चिलीम ओढत बसतात. चिलीम पेटवण्यासाठी वापरलेल्या काड्या पेटत्या अवस्थेत फेकल्या जात असल्याने येथे वारंवार आग लागत असल्याचे सांगण्यात येते. या आगीवर शिवसेनेचे संदीप सुर्वे स्वतः पाणी टाकून नियंत्रण मिळवत असल्याची माहिती आहे. हा प्रकार प्रामुख्याने मध्यरात्रीच्या सुमारास घडत आहे. यामुळे मोठा अपघात होण्याची शक्यता नाकारता येत नाही. त्यामुळे विठ्ठलवाडी पोलिसांनी या परिसरात नियमित व कडक गस्त घालून नशेखोरांचा हा प्रकार तातडीने आटोक्यात आणावा, अशी मागणी संदीप सुर्वे यांनी केली आहे.