मयूर शिंदेंचा भाजप प्रवेश लांबणीवर
ठाणे, ता. १६ : राष्ट्रवादीचे (शरदचंद्र पवार गट) युवा नेते मयूर शिंदे यांचा भाजपमधील जाहीर प्रवेश तांत्रिक कारणास्तव लांबणीवर पडला आहे. सोमवारी (ता. १५) महापालिका निवडणुकांसाठी आचारसंहिता जाहीर झाल्यामुळे हा निर्णय घेण्यात आला असला, तरी शिंदे भाजपमध्ये ताकदीने काम करतील, असा विश्वास भाजप नेत्यांनी व्यक्त केला आहे.

सावरकर नगर येथील आर. जे. ठाकूर महाविद्यालयाच्या पटांगणात भाजप प्रदेशाध्यक्ष रवींद्र चव्हाण यांच्या उपस्थितीत हा सोहळा रंगणार होता. यासाठी मोठी तयारी करण्यात आली होती, मात्र सायंकाळी निवडणूक आयोगाची पत्रकार परिषद होऊन आचारसंहिता लागू झाल्याने ऐनवेळी जाहीर कार्यक्रम स्थगित करावा लागला. मयूर शिंदे यांचा हा भाजपमधील प्रवेश म्हणजे एक प्रकारे ‘घरवापसी’ मानली जात आहे.

जाहीर सभा रद्द झाली असली तरी आमदार निरंजन डावखरे आणि जिल्हाध्यक्ष संदीप लेले यांनी कार्यक्रमस्थळी भेट दिली. ‘‘प्रवेशाची तारीख पुढे ढकलली असली तरी मयूर शिंदे भाजपमध्येच आहेत आणि ते ताकदीने काम करतील,’’ असा विश्वास डावखरे यांनी व्यक्त केला.

राजकीय प्रवास
१० एप्रिल २०२२ रोजी शिंदे यांनी जितेंद्र आव्हाड यांच्या नेतृत्वाखाली राष्ट्रवादीत प्रवेश केला होता, जिथे त्यांना युवक कार्याध्यक्षपद मिळाले होते. आता पुन्हा भाजपमध्ये आल्याने सावरकर नगर परिसरात भाजपची ताकद वाढणार आहे.

उमेदवारीची शक्यता?
मयूर शिंदे यांचा संबंधित परिसरात दांडगा जनसंपर्क असल्याने आगामी महापालिका निवडणुकीत भाजप त्यांना याच भागातून संधी देण्याची शक्यता राजकीय वर्तुळात वर्तवली जात आहे. केवळ अधिकृत घोषणा बाकी असली तरी समर्थकांमध्ये त्यांच्या प्रवेशाचा उत्साह कायम आहे.