अनियंत्रित कारची ट्रेलरला धडक
कारचालकाचा मृत्यू, कासा पोलिस ठाण्यात गुन्हा दाखल
कासा, ता. १६ (बातमीदार)ः ट्रेलरला पाठीमागून जोरदार धडक देणाऱ्या भरधाव कारच्या चालकाचा अपघातात मृत्यू झाला आहे. मुंबई-अहमदाबाद राष्ट्रीय महामार्गावर आंबोली गावाच्या हद्दीत शुक्रवारी (ता. १२) दुपारी हा अपघात झाला. याप्रकरणी कासा पोलिस ठाण्यात गुन्हा दाखल आहे.
गुजरातच्या नवसारी भागातील अस्लम मुलतानी (वय ४२) कारने मित्र मोहम्मदला मुंबई विमानतळावर घेण्यासाठी जात होते. आंबोली हद्दीतील एका पेट्रोल पंपासमोर दुपारी दीडच्या सुमारास त्यांच्या कारने ट्रेलरला पाठीमागून जोरदार धडक दिली. या अपघातात अस्लम मुलतानीच्या डोक्याला, उजव्या हातास गंभीर दुखापत झाली. त्यांना तातडीने रुग्णालयात दाखल करण्यात आले; मात्र उपचारापूर्वीच त्यांचा मृत्यू झाला.