विशाल वळवीचे ऐतिहासिक विजेतेपद
अल्ट्रा माउंटन ट्रेल रनिंग स्पर्धा

जव्हार, ता. १६ (बातमीदार) : देशातील अल्ट्रा माउंटन ट्रेल रनिंग प्रकारातील विद्यमान राष्ट्रीय विक्रम जव्हार तालुक्यातील धावपटू विशाल शंकर वळवी याने मोडीत काढत ऐतिहासिक यश संपादन केले. यापूर्वी हा विक्रम हेमंत लीबू याच्या नावावर होता. त्याने १० तास ३२ मिनिटांत ही शर्यत पूर्ण केली होती, मात्र विशाल वळवीने १० तास ९ मिनिटे ४० सेकंदांत ही स्पर्धा पूर्ण करत नवा राष्ट्रीय विक्रम प्रस्थापित केला आहे. शनिवारी (ता. १३) पार पडलेल्या या स्पर्धेचे यंदाचे आठवे वर्ष होते.
जव्हार तालुक्यातील रामखिंड (घिवंडा) येथील रहिवासी असलेल्या विशाल वळवीने सातत्यपूर्ण सराव आणि दृढ इच्छाशक्तीच्या बळावर डोंगराळ भूभाग, तीव्र चढ-उतार आणि प्रचंड शारीरिक सहनशक्तीची परीक्षा घेणाऱ्या या शर्यतीत हे यश संपादन केले.
अल्ट्रा माउंटन ट्रेल रनिंग म्हणजे मॅरेथॉनपेक्षा लांब (४२.१९५ किमी पेक्षा जास्त) अंतर नैसर्गिक आणि डोंगराळ प्रदेशात धावणे, ज्यात खडबडीत, चढ-उताराचे मार्ग, डोंगर आणि अनेकदा अनेक तास किंवा दिवस लागणारे खूप मोठे आव्हान असते. त्यात धावपटू निसर्गाच्या सान्निध्यात राहून स्वतःची सहनशक्ती तपासतात.

जगभरातील धावपटूंचा सहभाग

सिंहगडाच्या पायथ्यापासून सुरू होऊन राजगड, तोरणा किल्ला आणि लिंगाण्याच्या पायथ्यापर्यंत, त्यानंतर रायलींग पठार असा खडतर आणि आव्हानात्मक मार्ग या मॅरेथॉनसाठी निश्चित करण्यात आला होता. भारतासह फ्रान्स, इंग्लंड, अमेरिका, दक्षिण कोरिया, स्वित्झर्लंड, नेदरलँड, नॉर्वे आणि भारतातील २४ राज्ये व ५५ शहरांतील ९५० हून अधिक धावपटूंनी स्पर्धेत सहभाग नोंदवला. १०० किमी, ५३ किमी, २५ किमी आणि ११ किमी अशा चार विभागांत ही मॅरेथॉन स्पर्धा घेण्यात आली.