पीक मळणीला वेग
जव्हारमधील आदिवासी भागात शेतीची कामे सुरू

जव्हार, ता. १६ (बातमीदार) : यंदा, पावसाळा अधिक काळ लांबल्याने कोकणातील शेतीचे नुकसानही मोठ्या प्रमाणात झाले आहे, मात्र जे शेतात पिकले ते पदरात पाडून घेण्यासाठी शेतकरी प्रयत्नशील आहे. जव्हार तालुक्यातील आदिवासी भागात पिकाच्या मळणीला वेग आला आहे.
शेणाने सारवलेले स्वच्छ खळे करून त्यावर भात, नागली, वरई, उडीद, कुळीद, तूर आदी पिकांची मळणी पारंपरिक पद्धतीने केली जात आहे. तसेच भाताच्या कठीण गवताची मळणी झाल्यावर पेंढा व्यवस्थित रचून उडवी सजू लागली आहेत.
जव्हार, न्याहाळे तसेच तालुक्यातील बहुतांश भागात भात हेच मुख्य पीक आहे. या पिकाची काढणी दिवाळीपासून सुरू होते. भाताच्या पेंढ्यात जनावरांना हानिकारक अशी खाज आणणारी कूस, तसेच इतर घटक असतात, मात्र खळ्यावर बैलांच्या पायाखाली मळणी केल्यास हे सर्व घटक निघून जातात. तसेच कडक असणारे गवतही खाण्यास मऊ होते. त्यामुळे या भागात थंडीला सुरुवात झाली, की मळणीला प्रारंभ केला जातो.

पारंपरिक शेतीला पसंती

भाताबरोबरच डोंगराळ भागात नागली, वरई यांचीही मळणी केली जाते. हल्ली भातशेतीत भात झोडण्याऐवजी थेट मळणी यंत्रात टाकून भाताचे धान्य काढले जाते. त्यामुळे गवताचा कठीण भाग मशीनमधून बाहेर पडत असल्याने मळणी करण्याची गरज लागत नाही, मात्र दुर्गम भागात यंत्राचा वापर फारसा होत नसल्याने बऱ्याच ठिकाणी पारंपरिक पद्धतीने शेती केली जाते.