नाल्यावरील तुटलेल्या झाकणांची दुरुस्ती करावी
काँग्रेसची मागणी, अपघाताचा धोका
नेरूळ, ता. १६ (बातमीदार) : जुईनगर सेक्टर २३ मधील जुई गाव, गायत्री निवास घर नंबर १६८३ व राधाकृष्ण निवास १६६५ समोर ये-जा करण्यासाठी असलेल्या छोट्या रस्त्यावरील नाल्यावरचे सिमेंटचे झाकण तुटलेले आहे. या ठिकाणाहून लोकांनी ये-जा करताना त्रास सहन करावा लागत आहे. तुटलेल्या झाकणांमुळे लहान मुले आणि ज्येष्ठ नागरिकांना दुखापत होण्याची शक्यता निर्माण झाली आहे.
साई स्पोर्ट्स दुकानासमोरच्या पदपथावरही अशीच समस्या आहे. येथे चालताना मोठा अपघात होऊ शकतो; लहान मूल किंवा ज्येष्ठ नागरिक पडल्यास त्यांच्या जीवाला धोका निर्माण होऊ शकतो. पदपथांच्या खाली असलेल्या नाल्याची सफाई करण्यासाठी बनविलेल्या चेंबरवर मोठे सिमेंटचे झाकण बसविण्यात आले होते, परंतु ते झाकण तुटले असून, लोक त्यावर लाकडी फळ्या टाकून ये-जा करत आहेत.
नवी मुंबईसाठी हे दृश्य भूषणावह नाही. या परिसरात गटारे व नाल्यावरील तुटलेली झाकणे त्वरित बदलली नाहीत, तर अपघात होऊन जीवितहानी किंवा जायबंदी होण्याची भीती आहे. समस्येचे गांभीर्य लक्षात घेऊन काँग्रेसचे कार्यकर्ते बाबुराव ठाकूर यांनी महापालिका प्रशासनाकडे तत्काळ संबंधित झाकणे बदलण्याचे निर्देश देण्याची मागणी केली आहे.