पशुसंवर्धन कर्मचाऱ्यांचा आंदोलनाचा इशारा
प्रलंबित मागण्यांसाठी जिल्हा परिषद प्रशासनाला निवेदन
कासा, ता. १७ (बातमीदार) : पालघर जिल्हा परिषद अंतर्गत पशुसंवर्धन विभागातील कर्मचाऱ्यांच्या विविध प्रलंबित मागण्यांकडे प्रशासनाने दुर्लक्ष केल्याने कर्मचाऱ्यांमध्ये संतापाची लाट उसळली आहे. वेतन वेळेवर न मिळणे आणि विविध लसीकरणांचे मानधन थकल्याने, पशुचिकित्सा व्यवसायी संघटनेने जिल्हा पशुसंवर्धन उपायुक्तांना निवेदन देऊन ''असहकार आंदोलनाचा'' इशारा दिला आहे.
कर्मचाऱ्यांचे वेतन दरमहा २० तारखेनंतर होते, तर ऑक्टोबर व नोव्हेंबर २०२५ चे वेतन अद्याप मिळालेले नाही. वेतन दरमहा १ तारखेला व्हावे, अशी मागणी करण्यात आली आहे. तर २१व्या पशुगणनेचे मानधन, केंद्र सरकारच्या एफएमडी, पीपीआर आणि ब्रुसेला लसीकरणाचे मानधन अनेक फेऱ्या पूर्ण होऊनही प्रलंबित आहे, कृत्रिम रेतन योजनेच्या पाचव्या फेरीपर्यंतचे देयके अद्याप कर्मचाऱ्यांना मिळालेली नाहीत आणि पशुवैद्यकीय संस्थांना मिळणारा सेवाशुल्क व वीज बिलाचा निधी रखडल्याने महावितरणकडून वीज कापण्याच्या सूचना येत आहेत, ज्याचा परिणाम कामकाजावर होत आहे, अशा तक्रारीही या निवेदनातून केल्या आहेत.
संस्थेचे अध्यक्ष, कार्याध्यक्ष आणि सचिव यांनी निवेदनात स्पष्ट केले आहे की, जर या मागण्या त्वरित निकाली काढल्या नाहीत, तर प्रशासनाविरुद्ध तीव्र असहकार आंदोलन छेडले जाईल. या निवेदनाच्या प्रती पशुसंवर्धन आयुक्त आणि जिल्हा परिषदेच्या मुख्य कार्यकारी अधिकाऱ्यांनाही पाठवण्यात आल्या आहेत.