एमआयडीसीमार्गे एसटीच्या फेऱ्या वाढविण्याची मागणी
विद्यार्थी, महिला व ज्येष्ठ नागरिकांचे हाल; प्रवाशांचे महामंडळाकडे साकडे
पोयनाड, ता. १७ (बातमीदार) : अलिबाग तालुक्यातील पेझारी परिसरातून शाळा, महाविद्यालये तसेच पेण, पनवेल व अलिबाग येथे जाणाऱ्या प्रवाशांसाठी जलपाडा ते पेझारी या एमआयडीसी मार्गावरील एसटी बससेवा अपुरी ठरत आहे. या मार्गावर फेऱ्या अत्यल्प असल्याने प्रवासी व विद्यार्थ्यांना मोठ्या अडचणींना सामोरे जावे लागत असून, एसटी बसेसची संख्या वाढवावी, अशी जोरदार मागणी महाराष्ट्र राज्यमार्ग परिवहन महामंडळाकडे करण्यात येत आहे.
सध्या एमआयडीसी मार्गे पेझारी ते रेवस ही केवळ दुपारची एकच एसटी बस सुरू आहे. त्यामुळे सकाळी व संध्याकाळी प्रवास करणाऱ्या विद्यार्थी, नोकरदार आणि ग्रामीण नागरिकांना खासगी वाहनांचा आधार घ्यावा लागतो किंवा जादा भाडे मोजावे लागते. परिणामी प्रवाशांवर अनावश्यक आर्थिक भुर्दंड पडत आहे.
जलपाडा ते पेझारी यादरम्यान भायमळा, वाघोली, विरवाडी, सुतारपाडा, खिडकी, कोपर, लेभी, चरी ही गावे येतात, मात्र पेझारीपर्यंत थेट एसटीची सोय नसल्याने अनेकांना तिनवीरा किंवा पळीपर्यंत चालत जावे लागते. त्यानंतर पेण, पनवेल किंवा अलिबागकडे जाणारी एसटी पकडावी लागते. पूर्वी या मार्गावर मांडवा-पेण, मांडवा-पनवेल, मांडवा-बोरिवली अशा एसटी फेऱ्या सुरू होत्या; परंतु गेल्या काही वर्षांपासून त्या बंद करण्यात आल्या आहेत.
या परिसरातील विद्यार्थी, महिला व ज्येष्ठ नागरिकांचे होणारे हाल लक्षात घेता, किमान शाळा व महाविद्यालयांच्या वेळेत तरी एमआयडीसी मार्गे रेवस-पेण, रेवस-पनवेल किंवा पेझारीपर्यंत एसटी बसेस सुरू कराव्यात, अशी ठाम मागणी आता प्रवासीवर्गाकडून होत आहे.