तळा शहरात राष्ट्रवादी काँग्रेसला जोरदार धक्का
फोंडळवाडी ग्रामस्थांची शिंदेंच्या शिवसेनेत ‘घरवापसी’
तळा, ता. १७ (बातमीदार) : तळा शहराच्या राजकारणात महत्त्वाची उलथापालथ घडत राष्ट्रवादी काँग्रेसला मोठा धक्का बसला आहे. शहरातील फोंडळवाडी गावातील ग्रामस्थांनी शिवसेना शिंदे गटात जाहीर पक्षप्रवेश करत ‘घरवापसी’ केल्याने तालुक्यातील राजकीय समीकरणे बदलण्याची चिन्हे दिसत आहेत. माणगाव येथील शासकीय विश्रामगृहात झालेल्या भव्य कार्यक्रमात हा पक्षप्रवेश पार पडला.
फोंडळवाडी गावाचा शिवसेनेशी जुना राजकीय संबंध आहे. शिवसेनेच्या स्थापनेपासून स्वर्गीय दत्ता चोरगे यांच्या नेतृत्वाखाली हे गाव शिवसेनेत सक्रियपणे कार्यरत होते, मात्र त्यांच्या आजारपणानंतर व निधनानंतर गावाकडे स्थानिक पातळीवर दुर्लक्ष झाल्याची भावना निर्माण झाली. परिणामी सुमारे चार वर्षांपूर्वी ग्रामस्थांनी राष्ट्रवादी काँग्रेसमध्ये प्रवेश केला होता. तथापि, राष्ट्रवादी काँग्रेसकडून गेल्या काही वर्षांत गावात अपेक्षित विकासकामे न झाल्याने, मूलभूत सुविधांकडे होत असलेले दुर्लक्ष आणि लोकांच्या प्रश्नांना पुरेसे प्राधान्य न मिळाल्यामुळे ग्रामस्थांमध्ये नाराजी वाढत गेली. रस्ते, पाणी, विकासकामे व गावाच्या सर्वांगीण प्रगतीबाबत समाधान न मिळाल्याने ग्रामस्थांनी पुन्हा शिवसेनेत परतण्याचा निर्णय घेतला. आमदार भरत गोगावले यांची कार्यपद्धती, तळा शहरप्रमुख राकेश वडके यांचे समाजकारण, तसेच तालुकाध्यक्ष प्रद्युम्न ठसाळ, लिलाधर खातू आणि नमित पांढरकाने यांच्या नेतृत्वावर विश्वास ठेवून हा निर्णय घेतल्याचे फोंडळवाडीचे अध्यक्ष शाम पवार यांनी सांगितले. शिवसेना शिंदे गटात प्रवेश केल्यानंतर गावाच्या विकासाला चालना मिळेल, असा विश्वास ग्रामस्थांनी व्यक्त केला. या पक्षप्रवेशामुळे तळा शहर व तालुक्यात राष्ट्रवादी काँग्रेसला मोठा धक्का बसला असून, शिवसेना शिंदे गटाची संघटनात्मक ताकद अधिक बळकट झाल्याचे चित्र आहे. आगामी निवडणुकांच्या पार्श्वभूमीवर हा प्रवेश महत्त्वपूर्ण मानला जात आहे.