प्रत्येक उमेदवार निवडून आणणे हाच फॉर्म्युला
ठाण्यात शिवसेना-भाजपच्या समन्वय समितीच्या बैठक

सकाळ वृत्तसेवा
ठाणे, ता. १७ : महापालिका निवडणुकीत लोकसभा आणि विधानसभा निवडणुकीप्रमाणे युती जाहीर करण्यात आली आहे. त्यानंतर ठाण्यात शिवसेना आणि भाजपच्या समन्वय समितीची पहिलीच बैठक वर्तक नगर येथील भाजप कार्यालयात बुधवारी (ता. १७) पार पडली. प्रत्येक उमेदवार निवडून आणणे हाच फॉर्म्युला असल्याचे भाजपकडून सांगण्यात आले आहे, तर शिवसेनेकडे (शिंदे गट) सर्वाधिक नगरसेवक आहेत. त्यामुळे पुढील बैठकीत सेनेच्या जागावाटपाचा प्रस्ताव देणार असल्याचे समोर आले. जागावाटपात योग्य तो सन्मान राखण्यात यावा, अशी अपेक्षा या वेळी भाजप नेत्यांनी व्यक्त केली.

महायुतीचा निर्णय वरिष्ठ पातळीवर निर्णय झाल्यानंतर मंगळवारी शिंदे सेनेचा पहिला कार्यकर्ता मेळावा पार पडला. यानंतर बुधवारी शिंदे सेना व भाजपच्या समन्वय समितीची बैठक पार पडली. या वेळी शिवसेनेचे खासदार नरेश म्हस्के, महिला आघाडी प्रमुख मीनाक्षी शिंदे, राम रेपाळे आणि पूर्वेश सरनाईक उपस्थित होते, तर भाजपकडून आमदार संजय केळकर, निरंजन डावखरे, शहर अध्यक्ष संदीप लेले आणि संजय वाघुले हे पदाधिकारी उपस्थित होते. या बैठकीत दोन्ही पक्षाकडून महापालिकेत महायुतीचे अधिक नगरसेवक कसे निवडून येतील, यावर चर्चा करण्यात आली. तसेच कोणीही कुठेही युतीच्या उमेदवार पाडण्यासाठी प्रयत्न करणार नाही, यावरदेखील एकमत झाल्याची माहिती सूत्रांनी दिली. ठाण्यात शिंदेसेनेकडे अधिकचे नगरसेवक असल्याने त्यांच्याकडून पुढील बैठकीत जागावाटपाचा प्रस्ताव आणण्यात यावा, असे मत या वेळी भाजपच्या नेत्यांनी व्यक्त केल्याची माहिती सूत्रांनी दिली. हा प्रस्ताव देताना, भाजपचा योग्य तो सन्मान राखला जाईल, अशी अपेक्षा व्यक्त केली.

महापौर महायुतीचाच
भाजप आमदार संजय केळकर यांनी सांगितले की, ‘समन्वय बैठकीत केवळ निवडणुकीत युतीचे अधिकचे नगरसेवक कसे निवडून येतील, हा फॉर्म्युला ठरला आहे. त्यानुसार ठाणे महापालिकेवर महायुतीचाच भगवा फडकेल. महायुती म्हणून आम्ही निवडणूक लढणार आहोत, जागावाटपाचा कोणताही फॉर्म्युला ठरलेला नाही.’ दुसरीकडे ‘या ठिकाणी मोठा भाऊ किंवा छोटा भाऊ अशी काही परिस्थिती नाही. आम्ही एकत्र निवडणूक लढणार असून, महापालिका निवडणुकीत ११० हून अधिक नगरसेवक हे महायुतीचेच निवडून येतील आणि महापौरसुद्धा महायुतीचाच असणार असल्याची माहिती खासदार नरेश म्हस्के यांनी दिली.

अजित पवार गट अलिप्त
ठाण्यात काही दिवसांपूर्वी राष्ट्रवादी अजित पवार गटाकडूनदेखील इच्छुकांना अर्ज वाटप करण्यात आले. या वेळी अजित पवार गटाचे ठाणे शहराध्यक्ष नजीब मुल्ला यांनी स्वबळाचा नारा दिला होता. तसेच वरिष्ठ पातळीवरदेखील भाजपसोबत न जाण्याचा निर्णय घेण्यात आला आहे. त्यामुळे ठाण्यात अजित पवार गट स्वतंत्र लढणार असल्याचे शिंदेसेना आणि भाजपच्या बैठकीतून दिसून आले.