कर्जत नगर परिषद मतमोजणीची जोरदार तयारी
स्ट्राँग रूमवर २४ तास कडेकोट पोलिस बंदोबस्त

पळसदरी (कर्जत) : कैलास म्हामले

कर्जत नगर परिषदेच्या सार्वत्रिक निवडणुकीनंतर आता मतमोजणीची तयारी अंतिम टप्प्यात आली असून, मतदान यंत्रांच्या सुरक्षिततेसाठी कर्जतमध्ये कडेकोट पोलिस बंदोबस्त ठेवण्यात आला आहे. नगर परिषद कार्यालयात तयार करण्यात आलेल्या स्ट्राँग रूमबाहेर पोलिसांचा २४ तास खडा पहारा असून, सीसीटीव्ही कॅमेऱ्यांच्या माध्यमातून आत व बाहेर सतत नजर ठेवली जात आहे. कर्जत नगर परिषदेच्या २१ जागांसाठी ४६ आणि नगराध्यक्षपदासाठी दोन अशा ४८ उमेदवारांचे भवितव्य येत्या २१ डिसेंबर रोजी स्पष्ट होणार आहे. त्यामुळे कर्जतकरांचे लक्ष आता मतमोजणीच्या निकालाकडे लागले आहे.

राज्य निवडणूक आयोगाच्या पत्रानुसार ३ डिसेंबर रोजी होणारी मतमोजणी २१ डिसेंबर रोजी पार पडणार आहे. मतमोजणीच्या पार्श्वभूमीवर मतदान यंत्र सुरक्षित ठेवण्याचे मोठे आव्हान प्रशासनासमोर होते. त्यासाठी सर्व आवश्यक खबरदारी घेण्यात आली आहे. स्ट्राँग रूमबाहेर व आत सीसीटीव्ही कॅमेरे बसवण्यात आले असून, उमेदवार व त्यांच्या प्रतिनिधींना स्क्रीनवर थेट चित्रीकरण पाहण्याची व्यवस्था करण्यात आली आहे, अशी माहिती सहाय्यक निवडणूक निर्णय अधिकारी तथा मुख्याधिकारी तानाजी चव्हाण यांनी दिली.

२ डिसेंबर रोजी कर्जत नगर परिषदेच्या १० प्रभागांतील एकूण २१ जागांसाठी ३३ मतदान केंद्रांवर मतदान पार पडले होते. यामध्ये थेट नगराध्यक्षपदासाठी दोन महिला उमेदवार रिंगणात होत्या. नगरसेवकपदासाठी ४६ उमेदवारांनी निवडणूक लढवली होती. या निवडणुकीत ७२.३५ टक्के मतदान झाले असून, एकूण २१,६८० मतदारांनी मतदानाचा हक्क बजावला आहे.

स्ट्राँग रूमच्या सुरक्षेसाठी नगर परिषद कार्यालयाच्या तळमजल्यावर स्वतंत्र पोलिस चौकी उभारण्यात आली आहे. येथे एक अधिकारी व कर्मचारी असा २४ तास बंदोबस्त ठेवण्यात आला आहे. पालिकेत येणाऱ्या नागरिकांची चौकशी करूनच त्यांना प्रवेश दिला जात आहे. तसेच अधिकारी व कर्मचाऱ्यांना ओळखपत्राशिवाय प्रवेश दिला जात नाही. स्ट्राँग रूमजवळ मेटल डिटेक्टरही बसवण्यात आले असून, कोणालाही शस्त्र नेण्यास मनाई आहे.

मतमोजणी २१ डिसेंबर रोजी सकाळी साडेनऊ वाजता उमेदवार व त्यांच्या प्रतिनिधींच्या उपस्थितीत स्ट्राँग रूमचे सील उघडून सुरू होणार आहे. त्यानंतर मतदान यंत्रे मतमोजणी कक्षात नेण्यात येतील. सकाळी दहा वाजता प्रत्यक्ष मतमोजणीला सुरुवात होणार असून, ३३ मतदान केंद्रांसाठी दहा टेबल लावण्यात येणार आहेत. मतमोजणी पाच फेऱ्यांमध्ये होणार आहे. प्रभाग १ ते ७ व ९ या प्रभागांचे निकाल तीन फेऱ्यांत, प्रभाग ८ चा निकाल चौथ्या फेरीत, तर प्रभाग १० चा निकाल पाचव्या फेरीत जाहीर होणार आहे. मतमोजणीच्या ठिकाणी उमेदवार, निवडणूक प्रतिनिधी आणि उमेदवाराने नेमलेला मतमोजणी प्रतिनिधी यांना अधिकृतपणे प्रवेश मिळणार आहे. मतमोजणीदरम्यान कोणताही अनुचित प्रकार घडू नये, यासाठी नगर परिषद कार्यालयापासून १०० मीटर परिसरात कडेकोट सुरक्षा ठेवण्यात आली आहे. चारही बाजूला कार्यकर्ते समर्थक यांना त्यां ठिकाणी निकाल ऐकू येण्यासाठी स्पीकर ची व्यवस्था करण्यात आलेली आहे. कार्यालयाच्या चारही बाजूंना नियंत्रण रेषा आखण्यात आली असून, परवानगी असलेल्या व्यक्तींनाच प्रवेश दिला जाणार आहे.