द्रुतगती मार्गावरील अपघातात ट्रकचालक जागीच ठार

खालापूर, ता. १७ (बातमीदार) ः पुण्याहून मुंबईच्या दिशेने सिमेंट ब्लॉक घेऊन जाणारा भरधाव ट्रक अनियंत्रित होऊन पुलाच्या खांबावर आदळल्याने अपघाताची घटना बुधवारी (ता. १७) सायंकाळी साडेचार वाजण्याच्या सुमारास मुंबई-पुणे द्रुतगती मार्गावरील अमृतांजन पुलाजवळ घडली. या भीषण अपघातात ट्रकच्या केबिनचा चक्काचूर होऊन चालकाचा जागीच मृत्यू झाला. बोर घाटातील अमृतांजन पुलाजवळील भाग उताराचा असून या पुलाजवळील रस्ता वळणदार आहे. सिमेंट ब्लॉक वाहतूक करणारा हा ट्रक या ठिकाणी आला असताना चालकाचे ट्रकवरील नियंत्रित सुटल्याने हा ट्रक पुलाच्या खांबावर आदळला. या धडकेत केबिनमधील चालकाचा जागीच मृत्यू झाला. मृत चालकाची ओळख पटली नसून अपघातानंतर बोरघाट पोलिस मदत केंद्र, आयआरबी देवदूत पथकाने तातडीने घटनास्थळी धाव घेतली. हा अपघातग्रस्त ट्रक हायड्राच्या साह्याने महामार्गाच्या शेजारी घेण्यात आला. तसेच रस्त्यामध्ये पडलेले सिमेंट ब्लॉक हटवल्यानंतर मुंबई-पुणे द्रुतगती मार्गावरील वाहतूक सुरळीत करण्यात आली.