‘सनबर्ग फेस्टिव्हल''ला विरोध
शिवडी पोलिसांत तक्रार

शिवडी, ता. १७ (बातमीदार) : शिवडी पूर्व येथील टिम्बर पॉइंट एस. टी. पी. येथे ‘सनबर्ग फेस्टिव्हल - २०२५’ या कार्यक्रमाचे आयोजन करण्यात येत आहे. कार्यक्रमाला स्थानिक नागरिकांचा तीव्र विरोध आहे. याविरोधात शिवडी गाडी अड्डा रहिवाशी संघ यांच्या वतीने शिवडी पोलिस ठाणे व वाहतूक विभाग शिवडी येथे लेखी पत्राद्वारे तक्रार देण्यात आली आहे.
नशामुक्त भारत अंतर्गत शासनाच्या तसेच सामाजिक संस्थांनच्या माध्यमातून ठिकठिकाणी जनजागृती करण्याचे कार्यक्रम राबविण्यात येतात असे असतानाही दक्षिण मुंबईतील शिवडीसारख्या भागात स्थानिकांचा तीव्र विरोध असतानाही ‘सनबर्ग फेस्टिव्हल - २०२५’ या कार्यक्रमाचे आयोजन करण्यात येत आहे. त्यासाठी तयारीही सुरू आहे. विभागात विना परवाना फेरीवाल्यांवर मुंबई पोर्ट ट्रस्ट, महापालिका, पोलिस, वाहतूक पोलिस विभागामार्फत कारवाई केली जाते, मात्र कोणतीही परवानगी नसताना येथे सनबर्ग फेस्टीवल - २०२५ साठी तयारी सुरू आहे. त्याच्यावर आद्याप कोणतीही कारवाई नाही. मग कायदे केवळ सामान्य जनतेसाठीच का? असा सवाल शिवडी गाडी अड्डा रहिवासी संघाने उपस्थित केला आहे.

मुंबई पोर्ट ट्रस्ट प्रशासन, पालिका प्रशासन, वाहतूक पोलिस विभाग यांच्याकडील शोबाबतची परवानगी पाहूनच कार्यक्रमाला शिवडी पोलिस ठाण्याकडून परवानगी दिली जाईल. विनापरवानगी हा कार्यक्रम होणार नाही.
- अभिजित जाधव, सहायक पोलिस निरीक्षक, शिवडी पोलिस ठाणे