उल्हासनगर, ता. १७ (बातमीदार) : महापालिका निवडणुकीचा बिगुल वाजताच उल्हासनगरमध्ये शिवसेना ठाकरे पक्षाने हालचालींना वेग दिला आहे. या पार्श्वभूमीवर शिवसेनेचे उत्तर भारतीय अध्यक्ष मनोज तिवारी यांच्या पुढाकाराने आणि कल्याण जिल्हाप्रमुख धनंजय बोडारे यांच्या मार्गदर्शनाखाली शहरात एक महत्त्वपूर्ण आढावा बैठक झाली.
बैठकीत आगामी निवडणुकीसाठी कोणकोणत्या प्रभागांत उमेदवार उभे करायचे; तसेच सिंधीबहुल परिसरात किती उमेदवार द्यायचे याबाबत सविस्तर चर्चा करण्यात आली. प्रभाग क्रमांक १, ३, ४, ५, ७, ८, ९, १०, ११ आणि १२ या ठिकाणी इच्छुक व निष्ठावंत शिवसैनिकांना विश्वासात घेऊन उमेदवारी अर्ज भरण्याची तयारी सुरू करण्याचे निर्देश देण्यात आले. तसेच प्रभाग क्रमांक २, ५ आणि ६ मध्ये सिंधी भाषिक युवा उमेदवारांना संधी देण्यावर विशेष भर देण्यात येणार असल्याचे जिल्हाप्रमुख धनंजय बोडारे यांनी मार्गदर्शन करताना स्पष्ट केले. बैठकीला उपजिल्हाप्रमुख राजेंद्र साहू, विधानसभा प्रमुख शिवाजी जावळे, उपशहरप्रमुख दिलीप मिश्रा, राजन वेलकर, भगवान मोहिते, सुरेश पाटील, सचिव डॉ. अमोल मोलावडे, युवासेना शहर अधिकारी ॲड. महेश फुंदे यांच्यासह अनेक पदाधिकारी व कार्यकर्ते उपस्थित होते. बैठकीतून ठाकरे गटाने आगामी महापालिका निवडणुकीसाठी संघटनात्मक बांधणी, प्रभागनिहाय नियोजन आणि युवकांना संधी देण्याचा स्पष्ट संदेश दिला असून, निवडणुकीच्या तयारीला प्रत्यक्ष सुरुवात झाल्याचे चित्र दिसून आले.