पालघर, डहाणू, जव्हार, वाड्यात मद्यबंदी
पालघर, ता. १७ (बातमीदार) : पालघर जिल्ह्यातील पालघर, डहाणू, जव्हार या तीन नगर परिषदा आणि वाडा नगर पंचायतीच्या सार्वत्रिक निवडणुकीची मतमोजणी २१ डिसेंबर (रविवार) रोजी पार पडणार आहे. ही प्रक्रिया शांततेत आणि निर्भय वातावरणात पार पाडण्यासाठी जिल्हाधिकारी डॉ. इंदुराणी जाखड यांनी मतमोजणीच्या दिवशी संबंधित क्षेत्रांत ‘मद्यविक्री बंद’ ठेवण्याचे आदेश दिले आहेत. पालघर, डहाणू, जव्हार नगर परिषद आणि वाडा नगर पंचायत हद्दीत रविवारी (ता. २१) मतमोजणी प्रक्रिया पूर्ण होईपर्यंत या आदेशानुसार, संबंधित क्षेत्रातील सर्व प्रकारच्या मद्यविक्रीच्या अनुज्ञप्त्या बंद राहतील. जर कोणीही या आदेशाचे उल्लंघन करून मद्यविक्री करताना आढळल्यास, त्यांच्यावर महाराष्ट्र मद्य निषेध अधिनियमांतर्गत कडक कायदेशीर कारवाई करण्यात येईल, असा इशारा प्रशासनाने दिला आहे. निवडणूक निकालानंतर कोणताही अनुचित प्रकार घडू नये आणि सार्वजनिक शांतता राखली जावी, यासाठी हे पाऊल उचलण्यात आले आहे.