ठाणे ‘झेडपी’च्या मुख्य कार्यकारी अधिकारीपदी रणजित यादव

सकाळ वृत्तसेवा
ठाणे, ता. १७ : जिल्हा परिषदेचे तत्कालीन मुख्य कार्यकारी अधिकारी रोहन घुगे यांची जळगाव जिल्हाधिकारीपदी नियुक्ती झाल्यानंतर त्यांच्या रिक्तपदी बुधवारी (ता. १७) रणजित यादव यांची नियुक्ती करण्यात आली आहे. त्यामुळे ठाणे झेडपीला पूर्णवेळ मुख्य कार्यकारी अधिकारी मिळाले आहेत.

ठाणे जिल्हा परिषदेचे मुख्य कार्यकारी अधिकारी रोहन घुगे यांची ऑक्टोबरमध्ये जळगाव जिल्हाधिकारीपदी नियुक्ती झाली. त्यानंतर गेल्या तीन महिन्यांपासून या पदाचा अतिरिक्त कार्यभार पालघर जिल्हा परिषदेचे मुख्य कार्यकारी अधिकारी मनोज रानडे यांच्याकडे सोपविण्यात आला होता. त्यातच बुधवारी शासनाच्या सामान्य प्रशासन विभागाने ठाणे जिल्हा परिषदेच्या मुख्य कार्यकारी अधिकारीपदी रणजित यादव यांची नियुक्ती केली. यादव हे सध्या गडचिरोली येथे एकात्मिक आदिवासी विकास प्रकल्प अधिकारी आणि सहाय्यक जिल्हाधिकारी, उपविभाग गडचिरोली या पदावर कार्यरत होते. ठाणे जिल्ह्याच्या ग्रामीण भागाचा सर्वांगीण विकास करण्याबरोबरच नावीन्यपूर्ण योजना राबविण्यासाठी जिल्हा परिषदेच्या मुख्य कार्यकारी अधिकारीपदावर मागील काही वर्षांत चार तरुण तडफदार नेतृत्व मिळाले असल्याचे दिसून येत आहे. यापूर्वी २०१५-१६ या कालावधीत मुख्य कार्यकारी अधिकारीपदी उदय चौधरी, त्यानंतर २०२२ ते २०२४ या कालावधीत मनुज जिंदाल तर, २०२४ ते ऑक्टोबर २०२५ या कालावधीत रोहन घुगे यांनी ठाणे जिल्हा परिषदेचे मुख्य कार्यकारी अधिकारी म्हणून जबाबदारी पार पडली. त्यानंतर आता रणजित यादव यांची वर्णी ठाणे झेडपीच्या मुख्य कार्यकारी अधिकारीपदी नियुक्ती झाली आहे.