गौतम नवलखा यांना दिल्लीत राहण्यास परवानगी
शहरी नक्षलवाद प्रकरण

सकाळ वृत्तसेवा
मुंबई, ता. १७ : शहरी नक्षलवादप्रकरणी सध्या जामिनावर असलेले मानवाधिकार कार्यकर्ते गौतम नवलखांना त्यांच्या दिल्लीस्थित घरी राहू देण्यास उच्च न्यायालयाने बुधवारी (ता. १७) परवानगी दिली. खटल्याच्या सुनावणीसाठी आवश्यकतेनुसार मुंबईतील विशेष न्यायालयात उपस्थित राहण्याचे आदेशही न्यायालयाने त्यांना दिलासा देताना दिले.
नवलखा यांनी दर शनिवारी सकाळी ९ ते ११ या वेळेत दिल्लीतील स्थानिक पोलिस ठाण्यात हजेरी लावावी, आपला पासपोर्ट जमा करावा आणि विशेष न्यायालयाच्या पूर्वपरवानगीशिवाय दिल्ली सोडू नये, आरोपनिश्चितीच्या वेळी विशेष न्यायालयात उपस्थित राहावे. त्यानंतर विशेष न्यायालयाच्या आवश्यकतेनुसार किंवा आदेश दिल्यानंतर सुनावणीला उपस्थित राहावे, अशा अटीही न्या. भारती डांगरे आणि न्या. श्याम चांडक यांच्या खंडपीठाने दिलासा देताना घातल्या. सध्या नवलखा हे महिन्यातून एकदाच स्थानिक पोलिसांसमोर हजेरी लावत असल्यामुळे, दर आठवड्याऐवजी दर महिन्याला एकदा स्थानिक पोलिस ठाण्यात हजेरी लावू देण्याची विनंती त्यांच्या वतीने वकील युग चौधरी यांनी न्यायालयाकडे केली. तथापि, नवलखा यांना स्वातंत्र्याचा अधिकार असला तरी ते पूर्णपणे स्वतंत्र नसल्याचे नमूद करताना ही विनंती खंडपीठाने फेटाळून लावली. 
...
प्रकरण काय? 
नवलखा यांना २०२३ मध्ये उच्च न्यायालयाने जामीन मंजूर केला होता; परंतु त्यांनी सत्र न्यायालयाच्या पूर्वपरवानगीशिवाय मुंबई सोडून जाऊ नये, अशी अट त्यांना घालण्यात आली होती. यावर्षी त्यांनी सत्र न्यायालयात अर्ज करून त्यांना दिल्लीत राहू देण्याची परवानगी मागितली होती. तथापि, सत्र न्यायालयाने त्यांचा अर्ज फेटाळल्याने त्यांंनी उच्च न्यायालयात धाव घेतली होती.