अंबरनाथमध्ये दोन रिक्षांची तोडफोड; गुन्हा दाखल

अंबरनाथ, ता. १७ (वार्ताहर) : प्रभाग क्रमांक १७ मध्ये शिवसेना उमेदवारांचे पोस्टर (स्टीकर) लावलेल्या दोन रिक्षांची बुधवारी (ता. १७) पहाटे तोडफोड करण्यात आल्याची घटना घडली. ही घटना सीसीटीव्हीत कैद झाली असून, याप्रकरणी शिवाजीनगर पोलिसांनी अदखलपात्र गुन्हा दाखल केला आहे. अंबरनाथच्या प्रभाग १७ मधील गुलमोहर चौकात बुधवारी पहाटे ३ वाजता ही घटना घडली. या चौकात आंबेडकरनगरमध्ये राहणारे मुकेश मोरे आणि अतुल काकडे यांनी आपल्या रिक्षा उभ्या केल्या होत्या. त्यांच्या रिक्षांवर शिवसेनेच्या स्थानिक उमेदवारांचे स्टिकर लावले होते. मध्यरात्रीनंतर दोन दुचाकींवरून आलेल्या चार जणांनी हे स्टिकर फाडले आणि रिक्षांचीही तोडफोड केली. यानंतर हे आरोपी रवी अपार्टमेंटच्या दिशेने निघून गेले. ही संपूर्ण घटना सीसीटीव्हीत कैद झाली. दरम्यान, याप्रकरणी शिवाजीनगर पोलिसांनी रिक्षाचालकांच्या तक्रारीवरून अदखलपात्र गुन्हा दाखल केला आहे.