स्थगित पाच प्रभागांत प्रचाराचा धडाका
उमेदवारांना मिळाला ‘बोनस’ वेळ
बदलापूर, ता. १८ (बातमीदार) : बदलापूर नगरपालिकेच्या स्थगित केलेल्या पाच प्रभागांसाठी येत्या २० डिसेंबर रोजी मतदान होत आहे. या निवडणुकीत उमेदवारांना प्रचारासाठी निवडणूक आयोगाकडून अतिरिक्त वेळ देण्यात आला असून, शुक्रवारी (ता. १९) रात्री १० वाजेपर्यंत प्रचारासाठी मुभा असेल. या ‘बोनस’ संधीमुळे उमेदवारांनी आपले प्रभाग पिंजून काढण्यास सुरुवात केली आहे.

साधारणपणे मतदानापूर्वी ४८ तास आधी प्रचार थांबतो, मात्र २ डिसेंबरच्या मतदानावेळी उमेदवारांना प्रचारासाठी कमी वेळ मिळाल्याने आयोगाने मतदानाच्या आदल्या रात्री १० वाजेपर्यंत प्रचाराची मुभा दिली होती. तोच नियम आता २० डिसेंबरला होणाऱ्या मतदानासाठीही लागू करण्यात आला आहे. यामुळे उमेदवारांना मतदारांच्या घराघरांत पोहोचण्यासाठी जास्तीत जास्त वेळ मिळाला आहे. प्रभाग ५ (ब) मध्ये दोन , प्रभाग ८ (अ) मध्ये तीन, प्रभाग १० (ब)मध्ये सात, प्रभाग १५ (ब) मध्ये दोन, प्रभाग १७ (अ) मध्ये ४ उमेदवार निवडणुकीच्या रिंगणात आहेत.

या वाढीव वेळेचा फायदा घेत उमेदवारांनी वैयक्तिक भेटीगाठी, पदयात्रा आणि कोपरा सभांच्या माध्यमातून मतदारांपर्यंत प्रभावीपणे पोहोचण्याचा प्रयत्न केला आहे. २ डिसेंबर रोजी झालेल्या मतदानाच्या तुलनेत या पाच प्रभागांत मतदारांचा उत्साह आणि मतदानाची टक्केवारी लक्षणीयरीत्या वाढेल, असा विश्वास राजकीय विश्लेषकांकडून व्यक्त केला जात आहे.