तपोवनात तूर्तास वृक्षतोड नाही

राज्य सरकार, नाशिक पालिकेची न्यायालयात ग्वाही

सकाळ वृत्तसेवा
मुंबई, ता. १८ : नाशिक येथील प्रस्तावित कुंभमेळ्यात साधुग्राम उभारण्यासाठी तपोवनातील जवळपास १,८०० झाडांची कत्तल करण्याबाबतच्या याचिकेची उच्च न्यायालयाने गुरुवारी (ता. १८) गंभीर दखल घेतली. न्यायालयाने राज्य सरकारसह सर्व प्रतिवादींना नोटीस बजावली. तसेच पुढील सुनावणीपर्यंत वृक्षतोड करण्यास मनाई केली. त्यावर वृक्षताेडीसंदर्भात आलेल्या सूचना-हरकतींवर निर्णय हाेईपर्यंत वृक्षतोड करणार नसल्याची तोंडी हमी राज्य सरकार आणि नाशिक महापालिकेच्या वतीने मुख्य न्यायमूर्तींच्या अध्यक्षतेखालील खंडपीठाला देण्यात आली.

याचिकेत प्रतिवादी करण्यात आलेल्यांना न्यायालयाने नोटीस बजावली आणि न्यायालयाच्या परवानगीशिवाय वृक्षतोड करण्यास मज्जाव करून सुनावणी १४ जानेवारीपर्यंत तहकूब केली. नाशिक येथे दर १२ वर्षांनी कुंभमेळा भरतो. यंदाच्या प्रस्तावित कुंभमेळ्यासाठी साधुग्राम उभारण्यात येणार असून, तपोवनातील हजारो वृक्षांवर  कुऱ्हाड चालवण्यात येणार आहे. त्याविरोधात नाशिकस्थित मधुकर जगताप यांनी वकील पायल वर्धन आणि ओमकार वाबळे यांच्यामार्फत जनहित याचिका केली आहे. नाशिक महापालिका आणि वृक्ष प्राधिकरणाच्या या निर्णयाला पर्यावरणप्रेमी, स्थानिकांचा मोठ्या प्रमाणात विरोध असल्याचा दावा याचिकेत केला आहे. 
तात्पुरत्या स्वरूपात उभारणाऱ्या साधुग्रामसाठी ३० ते ४० वर्षे जुन्या वृक्षांवर कुऱ्हाड चालवली जाणार असून, ही झाडे नाशिक शहराला प्राणवायू आहेत; परंतु विकासाच्या नावाखाली पर्यावरणाचा ऱ्हास केला जात आहे, असा दावा करून या निर्णयाला स्थगिती देण्याची मागणी याचिकेत केली आहे.