वाहतूक कोंडीमुळे पर्यटकांची वाट बिकट
धरमतर ते पळी, अलिबागपर्यंत अरुंद रस्‍त्‍यामुळे वाहनांच्या रांगा
पोयनाड, ता. २० (बातमीदार) ः सध्या नाताळ व नववर्ष स्वागताच्या पार्श्वभूमीवर पर्यटनाचा हंगाम जोमात सुरू असून अलिबाग, मुरूड, नांदगाव, नागाव, किहीम, काशीद आदी समुद्रकिनाऱ्यांकडे पर्यटकांचा मोठा ओघ वाढला आहे. मात्र या पर्यटनाचा आनंद वाहतूक कोंडीमुळे हिरावला जात असल्याचे चित्र सध्या पोयनाड परिसरात दिसून येत आहे. विशेषतः वडखळ–अलिबाग राज्यमार्गावर धरमतर ते पळी आणि पुढे अलिबागपर्यंत सातत्याने होणाऱ्या वाहतूक कोंडीमुळे पर्यटकांसह स्थानिक नागरिकही त्रस्त झाले आहेत.
या मार्गावर गेल्या काही दिवसांपासून वाहनांची संख्या प्रचंड वाढली असून रस्ता अरुंद असल्याने तसेच वाहनचालकांकडून वाहतुकीच्या नियमांचे उल्लंघन होत असल्याने कोंडी अधिक तीव्र होत आहे. एरवी १५ ते २० मिनिटांत पार होणारे अंतर शनिवारी व रविवारी एक ते दीड तास लागत असल्याने पर्यटक हैराण झाले आहेत. याचा थेट फटका सर्वसामान्य नागरिक, विद्यार्थी, स्थानिक व्यापारी तसेच एसटीने प्रवास करणाऱ्या प्रवाशांना बसत आहे. अलिबाग आणि मुरूड परिसरात राज्याच्या विविध भागांतून मोठ्या प्रमाणावर पर्यटक दाखल होत असून शाळा व महाविद्यालयांच्या शैक्षणिक सहलींचीही संख्या वाढली आहे. मात्र वडखळ–अलिबाग राज्यमार्गावरील वाहतूक कोंडीमुळे या सहलींच्या एसटी बसेसना शहाबाज ते पळी आणि पुढे अलिबागपर्यंत तासनतास एकाच ठिकाणी थांबावे लागत आहे. परिणामी विद्यार्थ्यांचे वेळापत्रक कोलमडत असून चालकांनाही मोठ्या अडचणींचा सामना करावा लागत आहे. वाहतूक कोंडीची प्रमुख कारणे म्हणजे लेनची शिस्त न पाळणे, एका मार्गिकेवर दोन ते तीन रांगा लावून वाहने उभी करणे, मधोमध घुसखोरी करणे, तसेच खरेदीसाठी रस्त्यावरच वाहने उभी करणे ही आहेत. यामुळे पोयनाड परिसरात वारंवार वाहतूक ठप्प होत आहे. या गंभीर समस्येकडे वाहतूक पोलिस व संबंधित प्रशासनाने तातडीने लक्ष देऊन योग्य नियोजन करावे, अशी मागणी पर्यटकांसह स्थानिक नागरिकांकडून होत आहे.
..................
चौकट :
कोंडी होण्याची कारणे

वाहतूक नियमांचे उल्लंघन

एका लेनमध्ये दोन ते तीन वाहनांच्या रांगा

वाहनांच्या रांगेत मधोमध घुसखोरी

खरेदीसाठी रस्त्यावरच वाहन उभे करणे

नाक्यांजवळ व वळणांवर वाहने थांबवणे

शहाबाज ते पेझारी दरम्यान अंतर्गत रस्त्यांचा गैरवापर