रांगोळीच्या माध्यमातून पाणी बचतीचा संदेश
डहाणूतील गांगणगावात पाणलोट महोत्सव

वाणगाव, ता. २० (बातमीदार) : डहाणू तालुक्यातील गांगणगाव येथे पाणलोट महोत्सव कार्यक्रमात विद्यार्थ्यांनी रांगोळीच्या माध्यमातून पाणी बचतीचा संदेश दिला. जल, जंगल, जमीन, जनावरे, जनता या सर्वांना पाण्याची आवश्यकता असते. यासाठी ग्रामस्थांनी सामूहिक प्रयत्न केले पाहिजेत, असे मत कृषी अधिकारी जगदीश पाटील यांनी व्यक्त केले.
सरपंच सविता पालकर यांनी या कार्यक्रमाचे अध्यक्षस्थान भूषविले. गावातील शेतकरी बचत गट, परिसरातील गावातील सरपंच, पाणलोट समितीचे अध्यक्ष व सचिव या कार्यक्रमाला उपस्थित होते. तालुका कृषी अधिकारी अनिल नरगुलवार, वाणगाव मंडळ कृषी अधिकारी सचिन तोरवे, उपकृषी अधिकारी किशोरी विशे, विशाल नाईक, सहाय्यक कृषी अधिकारी रेखा डोंबरे यावेळी उपस्थित होते.
गावातील पाणलोट समितीचे सचिव खरपडे म्हणाले की, गावाच्या विकासासाठी पंतप्रधान कृषी सिंचाई योजनेअंतर्गत निधीचा सुयोग्य वापर केला आणि गावात गॅबियन बंधारे, वैयक्तिक लाभाच्या योजना, गटासाठी अवजारे बँक याचा लाभ घेऊन आर्थिक उन्नतीसाठी प्रयत्न केले. उमेद मार्फत गावातील महिला बचत गटांना फिरते भांडवल देखील उपलब्ध करून दिले. त्यामुळे महिला बचत गट स्वयंपूर्ण होऊ शकले. ग्रामपंचायत सरपंच यांच्या यावेळी हस्ते वृक्षारोपण करण्यात आले. गॅबियन बंधाराचे भूमिपूजन करण्यात आले. कार्यक्रमाला जिल्ह्याचे प्रतिनिधी योगेश पाटील, तांडेल, सारिका जाधव उपस्थित होते. कार्यक्रमाचे नियोजन शलाका इंदुलकर, अजय धोडी, कुणाल रावते यांनी केले.

विद्यार्थ्यांसाठी स्पर्धा

पाणलोट महोत्सव निमित्त आयोजित शालेय विद्यार्थ्यांच्या विविध स्पर्धांचे आयोजन केले होते. त्यातील विजयी विद्यार्थ्यांना बक्षीस देण्यात आले. वकृत्व स्पर्धेत सहभागी झालेल्या काही विद्यार्थ्यांनी पाणलोट बाबत महत्त्व विशद केले.