फेस्कॉमकडून पूरग्रस्त शेतकऱ्यांसाठी १५.५९ लाखांची मदत
मुख्यमंत्री सहाय्यता निधीकडे धनादेश सुपूर्द
नेरूळ, ता. २० (बातमीदार) : पावसाळ्यात महाराष्ट्रातील विविध भागांत झालेल्या अतिवृष्टी व पूरस्थितीमुळे शेतकरी व नागरिकांचे मोठ्या प्रमाणावर नुकसान झाले. या संकटग्रस्तांच्या मदतीसाठी फेस्कॉम (फेडरेशन ऑफ सीनियर सिटिझन्स ऑर्गनायझेशन महाराष्ट्र) यांच्या वतीने मुख्यमंत्री सहाय्यता निधीस १५ लाख ५९ हजार रुपयांची आर्थिक मदत देण्यात आली.
हा मदतीचा धनादेश देवेंद्र फडणवीस, मुख्यमंत्री महाराष्ट्र राज्य आणि एकनाथ शिंदे, उपमुख्यमंत्री यांच्या उपस्थितीत मंत्रालयात सुपूर्द करण्यात आला. या वेळी सामाजिक न्याय मंत्री संजय शिरसाठ हेही उपस्थित होते.
फेस्कॉमचे महाराष्ट्र अध्यक्ष डॉ. अण्णासाहेब टेकाळे यांनी २८ सप्टेंबरला तातडीची ऑनलाइन बैठक घेऊन राज्यातील सर्व ज्येष्ठ नागरिक संघटना व प्रादेशिक विभागांना मुख्यमंत्री सहाय्यता निधीस पूरग्रस्तांसाठी मदत करण्याचे आवाहन केले होते. या आवाहनाला राज्यभरातून उत्स्फूर्त प्रतिसाद मिळाला.
यामध्ये पश्चिम विदर्भ प्रादेशिक विभागाकडून चार लाख ३३ हजार रुपये, कोकण विभागाकडून दोन लाख ५८ हजार रुपये, मुंबई विभागाकडून दोन लाख ४० हजार रुपये तसेच इतर प्रादेशिक विभागांकडून मिळालेल्या मदतीतून एकूण १५ लाख ५९ हजार रुपयांचा निधी संकलित करण्यात आला.
हा निधी फेस्कॉमचे अध्यक्ष डॉ. अण्णासाहेब टेकाळे यांच्या हस्ते मुख्यमंत्री व उपमुख्यमंत्र्यांना सुपूर्द करण्यात आला. या वेळी फेस्कॉम मुंबई अध्यक्ष सुरेश पोटे, प्रभाकर गुमास्ते, दीपक करकरे व पामाळे उपस्थित होते.
आकडेवारी चौकट
एकूण मदत रक्कम : ₹ १५,५९,०००
पश्चिम विदर्भ विभाग : ₹ ४,३३,०००
कोकण विभाग : ₹ २,५८,०००
मुंबई विभाग : ₹ २,४०,०००
इतर प्रादेशिक विभाग : ₹ ६,२८,०००