तणावाच्या छायेत ‘उत्स्फूर्त’ मतदान
अंबरनाथमध्ये काही ठिकाणी ईव्हीएममध्ये बिघाड
शीतल मोरे : सकाळ वृत्तसेवा
अंबरनाथ, ता. २० : ईव्हीएम छेडछाड, पैसे वाटपाचे आरोप आणि बोगस मतदानावरून झालेला राडा अशा अत्यंत तणावपूर्ण वातावरणात अंबरनाथ नगर परिषदेसाठी शनिवारी मतदान पार पडले. शहरात राजकीय संघर्षाचे चित्र असतानाही मतदारांनी मात्र लोकशाहीच्या या उत्सवात उत्स्फूर्त सहभाग नोंदवला. महिला, ज्येष्ठ नागरिक आणि दिव्यांगांनी सकाळी बोचऱ्या थंडीतही केंद्रांवर रांगा लावल्याचे पाहायला मिळाले.

अंबरनाथच्या नगराध्यक्ष पदासह २९ पॅनेलमधील ५९ नगरसेवक पदांसाठी हे मतदान झाले. नगराध्यक्ष पदासाठी आठ, तर नगरसेवक पदासाठी २५९ उमेदवार रिंगणात आहेत. २ डिसेंबरला स्थगित झालेली ही निवडणूक अखेर शनिवारी पार पडली. सकाळी ७:३० ते दुपारी १:३० या वेळेत शहरात ३१.६४ टक्के मतदानाची नोंद झाली. शहराच्या पूर्व भागात मतदान शांततेत सुरू असताना पश्चिम भागात मात्र सकाळपासूनच गोंधळ उडाला. काही मतदान केंद्रांवरील ईव्हीएम मशीनमध्ये बिघाड झाल्याच्या तक्रारी प्राप्त झाल्या. यामुळे मतदारांमध्ये काही काळ संभ्रम निर्माण झाला होता. प्रशासनाने तातडीने हस्तक्षेप करून हा गोंधळ निस्तरला.

पोलिसांचा चोख बंदोबस्त
शहरातील तणाव लक्षात घेता पोलिसांनी ठिकठिकाणी कडक बंदोबस्त तैनात केला होता. बोगस मतदारांना ताब्यात घेतल्यानंतर केंद्रावर निर्माण झालेला तणाव पोलिसांनी वेळीच नियंत्रणात आणला. राजकीय आरोप-प्रत्यारोप सुरू असले तरी सर्वसामान्य मतदारांचा उत्साह कायम असल्याचे चित्र दुपारपर्यंत दिसून आले.

शहराचे लक्ष निकालाकडे
१० वर्षांनंतर होत असलेली ही निवडणूक आणि थेट नगराध्यक्ष निवडीची पद्धत यामुळे अंबरनाथमध्ये कमालीची चुरस निर्माण झाली आहे. प्रमुख उमेदवारांच्या चेहऱ्यावर विजयाचा आत्मविश्वास दिसत असला तरी अंबरनाथची जनता कोणाच्या पारड्यात आपले मत टाकते, हे पाहणे औत्सुक्याचे ठरेल.

नगराध्यक्ष पदाच्या उमेदवारांनी बजावला हक्क
अंबरनाथ तब्बल १० वर्षांच्या प्रदीर्घ प्रतीक्षेनंतर पार पडत असलेल्या अंबरनाथ नगर परिषदेच्या सार्वत्रिक निवडणुकीला सकाळी उत्साहात सुरुवात झाली. यंदा प्रथमच थेट जनतेमधून नगराध्यक्ष निवडला जाणार असल्याने या पदासाठी रिंगणात असलेल्या सर्व प्रमुख महिला उमेदवारांनी सहकुटुंब मतदान केंद्रावर हजेरी लावत आपला हक्क बजावला.

चिमुकल्यांना कडेवर घेऊन मातांचे मतदान
तणावपूर्ण वातावरणातही लोकशाहीप्रति असलेल्या कर्तव्याची काही प्रेरणादायी उदाहरणे समोर आली. नेहा फारूक शेख आणि सोनाली खंडागळे या दोन मातांनी आपल्या नवजात बालकांना कडेवर घेऊन मतदान केंद्रावर हजेरी लावली होती. ‘संपूर्ण परिवार मतदान करीत असताना आमचे मतही तितकेच मोलाचे आहे,’ अशी भावना या महिलांनी व्यक्त केली. दिव्यांगांनीही मोठ्या संख्येने उपस्थित राहून आपला हक्क बजावला.

रिंगणात २९ प्रभाग आणि २५९ उमेदवार
शहरातील २९ प्रभागांमध्ये सुरू असलेल्या या निवडणुकीत नगराध्यक्ष पदासाठी आठ, तर नगरसेवक पदासाठी २५९ उमेदवार आपले नशीब अजमावत आहेत. काही प्रभागांमध्ये मतदारांना तीन, तर काही ठिकाणी चार मते द्यावी लागत आहेत. तांत्रिक बाबींमुळे प्रारंभी मतदारांमध्ये काहीसा संभ्रम दिसून आला, तरीही मतदान केंद्रांवरील गर्दीवरून बदलाची लाट किंवा समर्थनाची जिद्द स्पष्टपणे दिसून येत होती.

प्रमुख उमेदवारांचे मतदान
शिवसेना शिंदे गटाच्या मनीषा वाळेकर यांनी पती माजी नगराध्यक्ष अरविंद वाळेकर यांच्यासह मतदान केले.
भाजपच्या तेजश्री करंजुले पाटील यांनी सहकुटुंब केंद्रावर उपस्थित राहून मतदानाचा हक्क बजावला.
ठाकरे गटाच्या महाविकास आघाडीच्या उमेदवार अंजली राऊत यांनी पतीसह मतदान करीत लोकशाही प्रक्रियेत सहभाग घेतला.
राष्ट्रवादी अजित पवार गटाच्या अश्विनी पाटील यांनी आपला मतदानाचा हक्क बजावला.
काँग्रेसच्या नूतन पाटील यांनीही सकाळीच मतदान केंद्रावर पोहोचून मतदान केले.

मतदारांचा खोळंबा
अनेक मतदान केंद्रांवर ईव्हीएम मशीनमध्ये तांत्रिक बिघाड झाल्याने मतदारांचा खोळंबा झाला. प्रभाग २९ मधील मोरवली पाडा, अंबरनाथ पश्चिमेतील गुरू नानक शाळा (केंद्र १३/६) आणि केंद्र १०१ येथे मशीन बंद पडल्याच्या तक्रारी आल्या.
यामुळे केंद्रांवर मोठा गोंधळ उडाला. अखेर निवडणूक अधिकाऱ्यांनी मशीन दुरुस्त केल्यानंतर मतदान प्रक्रिया पुन्हा सुरू झाली.