बदलापुरात मतमोजणीची जय्यत तयारी
आदर्श विद्या मंदिरात कडक बंदोबस्त; नगराध्यक्ष आणि नगरसेवक पदांचे निकाल एकाच वेळी येणार
बदलापूर, ता. २० (बातमीदार) : कुळगाव-बदलापूर नगरपालिकेच्या सार्वत्रिक निवडणुकीसाठी रविवारी (ता. २१) मतमोजणी होणार आहे. पालिकेच्या ४९ जागांसाठी २४ पॅनेलमध्ये झालेल्या या अटीतटीच्या लढतीचा निकाल काय लागतो, याकडे संपूर्ण शहराचे लक्ष लागले आहे. निवडणूक आयोगाच्या सूचनेनुसार, नगर परिषद प्रशासनाने मतमोजणीसाठी चोख व्यवस्था केली आहे.
बदलापूर पूर्वेतील आदर्श विद्या मंदिराची मतमोजणी केंद्र म्हणून निवड करण्यात आली आहे. येथे एकूण ३० टेबल्स लावण्यात आले असून, प्रत्येक टेबलवर सर्व पॅनेल्सची मतमोजणी समांतर पद्धतीने होईल. विशेष म्हणजे नगरसेवक पदासोबतच थेट नगराध्यक्ष पदाच्या उमेदवारांना मिळालेल्या मतांची आकडेवारीही एकत्रितपणे जाहीर केली जाणार आहे.
मुख्याधिकारी मारुती गायकवाड यांनी दिलेल्या माहितीनुसार, मतमोजणी केंद्रात कडक शिस्त पाळली जाईल. नगरसेवक पदाच्या प्रत्येक उमेदवारासोबत एक प्रतिनिधी (उमेदवार नसल्यास दोन) आणि नगराध्यक्ष पदाच्या उमेदवारासोबत २५ प्रतिनिधींना प्रवेश दिला जाईल. मोजणी केंद्रावर सीसीटीव्ही कॅमेरे आणि पोलिसांचा सशस्त्र बंदोबस्त तैनात केला आहे. आदर्श शाळेपासून ५०० मीटर अंतरापर्यंतचा परिसर (तलाठी कार्यालय व जुने नगर परिषद कार्यालय) सर्वसामान्यांसाठी बंद ठेवण्यात आला आहे.
राजकीय भवितव्य मतपेटीत बंद
बदलापूरमध्ये प्रामुख्याने भाजपा आणि शिवसेना (शिंदे गट) यांच्यात थेट सामना पाहायला मिळत आहे. नगरसेवक पदासाठी १४१ उमेदवार आणि नगराध्यक्ष पदासाठी पाच महिला उमेदवार रिंगणात आहेत. उद्या दुपारपर्यंत शहराचा नवा कारभारी कोण, याचे चित्र स्पष्ट होण्याची शक्यता आहे.