वाशी, ता. २३ (बातमीदार) : नवी मुंबई महापालिकेच्या निवडणुकीचे बिगुल वाजताच शहरातील राजकीय वातावरण तापू लागले आहे. नगरपालिका निवडणुकीच्या निकालाच्या पार्श्वभूमीवर महायुतीतील भाजप व शिवसेना शिंदे गटामध्ये उत्साहाचे वातावरण आहे. आगामी निवडणुकीत बहुमत मिळवण्याचा आत्मविश्वास त्यांच्याकडून व्यक्त केला जात आहे.

सध्या महापालिकेतील संख्याबळ, मागील काही वर्षांत विविध पक्षांतून झालेली पक्षप्रवेशांची मालिका, तसेच राज्यातील सत्तास्थिती पाहता भाजप व शिवसेना शिंदे गट अधिक बळकट झाल्याचे चित्र आहे. अनेक माजी नगरसेवक, पदाधिकारी आणि कार्यकर्ते महायुतीकडे वळल्यामुळे संघटनात्मक ताकदही वाढली आहे. भाजप व शिवसेना शिंदे गटाने निवडणुकीच्या तयारीला सुरुवात केली असून, प्रभागनिहाय आढावा बैठकांचा सपाटा सुरू आहे. इच्छुकांच्या मुलाखती, बूथनिहाय बांधणी, कार्यकर्त्यांमध्ये जबाबदाऱ्या वाटप आदींवर भर देण्यात येत आहे. विकासकामांचा मुद्दा, पायाभूत सुविधा, पाणीपुरवठा, रस्ते, आरोग्य आणि स्वच्छतेच्या कामांचा आढावा घेत मतदारांपर्यंत पोहोचण्याचे नियोजन करण्यात येत आहे. राज्यातील सत्ता आपल्या बाजूची असल्याचा फायदा नवी मुंबईतही होणार असल्याचे महायुतीच्या नेत्यांकडून सांगण्यात येत आहे.