लहान मुलांसाठी मोफत दंत चिकित्सा शिबिर
कल्याण, ता. २३ (वार्ताहर) : आपले दात व हिरड्यांची योग्य निगा कशी राखावी याबाबत लहान मुलांना मार्गदर्शन करत, ठाण्यात संत निरंकारी चॅरिटेबल फाउंडेशनच्या वतीने बालकांसाठी दंत चिकित्सा शिबिर पार पडले. यामध्ये १०४ मुलांची मोफत दंत तपासणी करण्यात आली. या शिबिरात डॉ. वीणा भगत, डॉ. स्वप्नाली गायकवाड व डॉ. मनाली जाधव यांच्याकडून उपस्थित लहान मुलांची सखोल दंत तपासणी करण्यात आली असून त्यांना आवश्यकतेनुसार पुढील उपचारासाठी मार्गदर्शन केले. तसेच, शिबिरामध्ये सहभागी मुलांना दातांची निगा राखण्यासाठी किटचे वाटप करण्यात आले. या शिबिराचे उद्‍घाटन सेवादल क्षेत्रीय संचालक अमोल सुर्वे यांच्या हस्ते झाले. याप्रसंगी मंडळाचे ठाणे सेक्टर संयोजक डॉ. आर. एस. यादव यांच्यासह अनेक सेवादल अधिकारी, प्रबंधक व सेवादल स्वयंसेवक उपस्थित होते.