वंचित मुलांसोबत रंगला ‘ख्रिसमस’ आनंदोत्सव
येऊरच्या जांभूळपाड्यात क्रिएटिव्ह स्कूलच्या विद्यार्थ्यांचा उपक्रम
ठाणे, ता. २३ (बातमीदार) : शिक्षणाच्या प्रवाहापासून काहीशा दूर असलेल्या आणि सोयीसुविधांचा अभाव असलेल्या मुलांच्या आयुष्यात आनंदाचे रंग भरण्यासाठी ठाण्याच्या क्रिएटिव्ह स्कूलने पुढाकार घेतला. नाताळच्या पार्श्वभूमीवर, शाळेच्या विद्यार्थ्यांनी येऊर-जांभूळपाडा येथील वंचित मुलांसोबत एकत्र येत हा सण अत्यंत उत्साहात आणि आपुलकीने साजरा केला. या उपक्रमादरम्यान क्रिएटिव्ह स्कूलच्या विद्यार्थ्यांनी जांभूळपाड्यातील लहान मुलांना ख्रिसमस ट्री बनवणे आणि सांता क्लॉज फेस डेकोरेशन करण्याचे प्रशिक्षण दिले. रंग, कागद आणि विविध साहित्यांच्या माध्यमातून या मुलांनी आपल्या कल्पनाशक्तीचा सुंदर आविष्कार घडवला. स्वतःच्या हाताने सजावट करताना या मुलांच्या चेहऱ्यावर उमललेले हास्य उपस्थितांचे मन जिंकून घेणारे होते.

शिक्षण म्हणजे केवळ पुस्तकी ज्ञान नसून ती एक सामाजिक जबाबदारी आहे, हेच या विद्यार्थ्यांनी आपल्या कृतीतून दाखवून दिले. केवळ मनोरंजन न करता माणुसकी आणि सहवेदनेचा अनुभव या उपक्रमातून सर्वांना मिळाला. जांभुळपाडा परिसरातील अनेक मुले शाळाबाह्य असल्याने, त्यांच्यात शिक्षणाविषयी गोडी निर्माण व्हावी हादेखील यामागील एक मुख्य उद्देश होता.

सांताने वाटले चॉकलेट्स
कार्यक्रमाच्या शेवटी क्रिएटिव्ह स्कूलच्या ‘सांता’ने सर्व मुलांना चॉकलेट्सचे वाटप करून सणाचा आनंद द्विगुणित केला. विद्यार्थ्यांच्या सर्वांगीण विकासासोबतच समाजाशी नाते जोडणारा हा उपक्रम परिसरात कौतुकाचा विषय ठरला आहे.