फुटबॉल स्पर्धा उत्साहात
कल्याणमध्ये ‘अस्मिता लीग’ला महिलांचा मोठा प्रतिसाद
कल्याण, ता. २३ (वार्ताहर) : खेलो इंडिया उपक्रमांतर्गत ‘अस्मिता लीग’ ही महिला फुटबॉल स्पर्धा सिटी पार्क येथील एलिट फुटबॉल अरेना येथे उत्साहात पार पडली. महाराष्ट्रात महिलांच्या फुटबॉलच्या विकासासाठी ही स्पर्धा महत्त्वाची ठरली. ही स्पर्धा क्रीडा प्राधिकरण भारत आणि केंद्रीय युवा व्यवहार व क्रीडा मंत्रालय यांच्या सहकार्याने, अखिल भारतीय फुटबॉल महासंघ, वेस्टर्न इंडिया फुटबॉल असोसिएशन आणि ठाणे फुटबॉल असोसिएशन यांच्या मान्यतेने आयोजित केली होती.
या स्पर्धेमध्ये शाळा व फुटबॉल अकादमींचे प्रतिनिधित्व करणारे एकूण आठ महिला संघ सहभागी झाले होते. त्यामध्ये रायन स्पोर्टस् क्लब, रोअर फुटबॉल अकादमी, सेक्रेड हार्ट एफसी, कम्युनिटी फुटबॉल क्लब, टोटल फुटबॉल अकादमी, सेंट्रल रेल्वे सेकंडरी स्कूल ॲण्ड ज्युनिअर कॉलेज, एस. पी. फुटबॉल अकादमी आणि फुटबॉल स्कूल ऑफ इंडिया या संघांचा समावेश होता. स्पर्धेत ९६ पेक्षा अधिक नोंदणीकृत खेळाडूंनी सहभाग घेतला होता.
या सोहळ्यास प्रशांत बालन, अल्फोन्सो सॅंटियागो आणि जे. पी. सिंग हे मान्यवर उपस्थित होते. महिला फुटबॉलच्या विकासासाठी दिलेल्या योगदानाबद्दल त्यांचा सत्कार करण्यात आला. या स्पर्धांमुळे महिला फुटबॉलमधील नवोदित प्रतिभेला योग्य व्यासपीठ मिळते, असे मत या वेळी व्यक्त करण्यात आले. ही स्पर्धा शीतल अँजेलिना रसलाम यांच्या मार्गदर्शनाखाली पार पडली.

कम्युनिटी फुटबॉल क्लब विजयी
या स्पर्धेचा अंतिम सामना कम्युनिटी फुटबॉल क्लब आणि रोअर फुटबॉल अकादमी यांच्यात झाला. निर्धारित वेळेत सामना बरोबरीत सुटल्यानंतर पेनल्टी शूटआऊटमध्ये कम्युनिटी फुटबॉल क्लबने ४-२ अशा फरकाने विजय मिळवत विजेतेपद पटकावले, तर रोअर फुटबॉल अकादमीने उपविजेतेपद मिळवले. स्पर्धेतील सर्वोत्तम खेळाडू क्रीशिका गंभीर, सर्वोत्तम गोलरक्षक मीरा देवरुखकर या दोन्ही खेळाडूंनी संपूर्ण स्पर्धेत सातत्यपूर्ण व प्रभावी कामगिरी करून विशेष ओळख निर्माण केली.