वाशी, ता. २३ (बातमीदार) : प्रभू येशूचा जन्मोत्सव मोठ्या उत्साहात साजरा करण्यासाठी बाजारात विविध प्रकारचे केक उपलब्ध झाले आहेत. प्लम केक, मार्झीपन केक आणि ग्वाआ चीज केकला खिश्चन बांधवांची विशेष पसंती आहे. मागील वर्षाच्या तुलनेत यंदा केकची विचारणा करण्यासाठी अधिक नागरिक येत आहेत, असे दुकानदारांकडून सांगण्यात येत आहे.

खिश्चन बांधवांची आवड निवड लक्षात घेऊन खास नाताळसाठी मागणीनुसार विशिष्ट प्रकारचे विविध केक तयार करण्यात येत आहेत. यामध्ये प्लम केक, मार्झीपॅन केक, ग्वाआ चीज केकसह सांताक्लॉजची प्रतिकृती, ख्रिसमस ट्री, तसेच फ्रेश क्रीम, चॉकलेट ब्राऊनी केक, प्लम हनी केक, मिक्स फ्रूट केक, रिअल प्लम, रीच प्लम, स्टार केक, स्टोलन ब्रेड आदीनांही विशेष मागणी असते. सद्य:स्थितीत ब्लॅक फॉरेस्ट केक, मिक्स फ्रूट, वेडिंग, चॉकलेट मड, निव्हर्सरी, थीम केक यांसारखे शंभरावर केकचे प्रकार ऑर्डरनुसार बनवून मिळतात. त्यांची किंमत आकर्षक फलेवर्स, वजन, तसेच डिझाईननुसार ठरते. नाताळसाठी २७० रुपयांपासून केक उपलब्ध असून, प्लमेकची एक हजार ते बाराशे रुपये प्रतिकिलो दराने विक्री करण्यात येत आहे. याखेरीज शुद्ध शाकाहारीसाठी अंड्याचा वापर न करता तयार केलेले केकही बेकऱ्यांमध्ये उपलब्ध असल्याची माहिती विक्रेते राहुल गुरव यांनी दिली.

प्लम केकला पसंती
काही दुकानांमध्ये होम मेड चॉकलेट्सही उपलब्ध आहेत. नाताळसाठी विशेष मागणी असलेल्या प्लम केकमध्ये अनेक प्रकार आढळतात. हा ड्राय केक असून, तीन महिन्यांआधी तो रममध्ये भिजवला जातो. रिच प्लम केक हा पूर्णपणे सुक्या मेव्यापासून तयार करण्यात येतो. मार्झीपॅन केक हा नाताळसाठी तयार करण्यात येत असलेला दुसरा महत्त्वाचा प्रकार. त्यातही प्रामुख्याने सुक्यामेव्याचा वापर होतो. यासाठी आंबा, स्ट्रॉबेरी, पेरू, कैरी, जांभूळ यांच्या रसाचा वापर करण्यात येतो.

ग्वाआ चीज लोकप्रिय
ग्वाआ चीज हा जास्त लोकप्रिय प्रकार आहे. हा केक तयार करताना पेरु, साखरेच्या पाकात उकळून तयार केलेल्या जेलीचा वापर करण्यात येतो. यासाठी मेहनत घ्यावी लागते. त्यामुळे नाताळ आणि ईस्टर या सणांच्या वेळीच हा केक तयार करण्यात येतो, असे विक्रेते राहुल गुरव यांनी सांगितले.