महाविकास आघाडीचा ‘मास्टर प्लॅन’ तयार
जागावाटपाचा संभाव्य फॉर्म्युला समोर; मनसे, काँग्रेसलाही मानाचे पान
ठाणे, ता. २३ : ठाणे महापालिका निवडणुकीसाठी महायुतीत जागावाटपाचा पेच अद्याप सुटलेला नसताना, दुसरीकडे महाविकास आघाडीने मात्र बाजी मारल्याचे चित्र आहे. शिवसेना (ठाकरे गट), राष्ट्रवादी (शरद पवार गट), काँग्रेस आणि आता ‘मविआ’चा भाग बनलेली मनसे यांच्यात जागावाटपाचा फॉर्म्युला अंतिम टप्प्यात असून, येत्या २-३ दिवसांत त्याची अधिकृत घोषणा होण्याची शक्यता सूत्रांनी वर्तवली आहे.

नगरपालिका निवडणुकांमध्ये शांत राहिलेल्या महाविकास आघाडीने आता महापालिकेत ताकदीने उतरण्याचा निर्णय घेतला आहे. चारही पक्षांच्या जिल्हा नेतृत्वाने आपापल्या प्रबळ दाव्यांच्या जागांचे प्रस्ताव वरिष्ठांकडे सोपवले आहेत. सुरुवातीला काँग्रेसने ३५-४०, मनसेने ४१ आणि शरद पवार गटाने ५० जागांची मागणी केली होती. मात्र, निवडून येण्याची क्षमता लक्षात घेऊन आता एक नवा फॉर्म्युला निश्चित करण्यात आल्याची चर्चा आहे.

येत्या दोन दिवसांत उद्धव ठाकरे आणि राज ठाकरे यांच्या युतीची अधिकृत घोषणा होण्याची दाट शक्यता आहे. मनसेने प्रामुख्याने घोडबंदर, वागळे, कळवा आणि दिवा या पट्ट्यातील ४१ जागांचा प्रस्ताव दिला होता, त्यापैकी २५ जागा त्यांना मिळण्याची चिन्हे आहेत. काही जागांच्या अदलाबदलीचा विषय सध्या सुरू असून, तो लवकरच मार्गी लागेल. एककीकडे अजित पवार गटाला महायुतीच्या जागावाटप चर्चेतून बाजूला ठेवल्याने ते नाराज आहेत, त्याचा फायदा उचलण्यासाठी महाविकास आघाडीने एकजूट दाखवली आहे. ठाणे हा मुख्यमंत्री एकनाथ शिंदे यांचा बालेकिल्ला असल्याने, या बालेकिल्ल्याला खिंडार पाडण्यासाठी चारही पक्षांनी एकत्र येऊन जागावाटपाचा पेच आधीच सोडवण्यावर भर दिला आहे.

मनसेचा ४१ जागांचा प्रस्ताव
ठाणे पालिकेच्या निवडणुकीत शिवसेना उद्धव ठाकरे गट आणि मनसे यांच्या युतीची घोषणा लवकरच होणार आहे. तसेच महाविकास आघाडीत मनसेदेखील सहभागी झाली असून, ठाणे पालिका निवडणूक महाविकास आघाडीच्या माध्यमातून लढविण्यात येणार आहे. त्यानुसार मनसेने घोडबंदर, वागळे, ठाणे, वर्तकनगर, कळवा आणि दिवा आदी भागातील ४१ जागांचा प्रस्ताव दिल्याची माहिती सूत्रांनी दिली.

असा असेल फॉर्म्युला?
ठाणे पालिकेच्या निवडणुकीत शिवसेना ठाकरे गट, राष्ट्रवादी शरद पवार गट, मनसे आणि कॉंग्रेस हे चारही पक्ष महाविकास आघाडी म्हणून निवडणुकीला सामोरे जाणार असून जागावाटपाचा प्रस्ताव सादर केला असून, अंतिम जागावाटपाचा फॉर्म्युलादेखील ठरला आहे. यामध्ये काँग्रेसला १४, मनसेला २५ जागा, शिवसेना उद्धव ठाकरे गटाला ५० आणि राष्ट्रवादी शरद पवार गटाला ४२ जागा मिळणार असल्याची माहिती सूत्रांनी दिली.