अपघातात तीन कामगार जखमी
तारापूर एमआयडीसी कारखान्यातील घटना
बोईसर, ता. २३ (बातमीदार) ः तारापूर एमआयडीसीमधील कॅलेक्स केमिकल अँड फार्मासिटिकल लिमिटेड कंपनीच्या प्लॉट क्रमांक एन-१०२/९१ येथील कारखान्यात सोमवारी (ता. २२) दुपारी अपघात घडला. रिॲक्टरमध्ये प्लॅस्टिक बॅगमधून कच्चा माल टाकण्याचे काम सुरू असताना अचानक रिऍक्टरमधून आग भडकली. या घटनेत तीन कामगार जखमी झाले.
यात रवी शंकर पटेल (वय ३२) हा कामगार गंभीर जखमी झाला आहे. तो प्लॅस्टिक बॅग रिॲक्टरमध्ये टाकत असताना अचानक आग निघाल्याने त्याचे दोन्ही हात, खांदे, मान तसेच एका बाजूचा कान आणि तोंड गंभीररीत्या भाजले. या अपघाताच्या वेळी विपिन कुमार गौतम (वय १८) व राजनबाबू कॉल (वय २५) हे दोघे रवी शंकर पटेल याला प्लॅस्टिक बॅगचे धागे काढून देत होते. या दोघांनाही किरकोळ भाजले आहेत. त्यांची प्रकृती स्थिर आहे. अपघातानंतर जखमींना तातडीने रुग्णालयात दाखल करण्यात आले. विपिन कुमार गौतम व राजनबाबू कॉल हे रोजंदारीवर काम करत असून, रवी शंकर पटेल हा कॉन्ट्रॅक्टरमार्फत ऑपरेटर म्हणून काम करत होता. दरम्यान, घटनेची माहिती मिळताच औद्योगिक सुरक्षा विभागाचे अधिकारी हिम्मतराव शिंदे यांनी कारखान्याला भेट देऊन अपघातस्थळाची पाहणी केली. तसेच जखमी कामगारांची भेट घेतली. प्राथमिक माहिती संकलित करण्यात आली असून, अपघाताच्या नेमक्या कारणांची सखोल चौकशी सुरू असल्याचे त्यांनी सांगितले.