विनयभंग करणाऱ्या शिक्षकाला अटक
नवी मुंबई, ता. २३ (वार्ताहर) : सानपाडा येथील एका नामांकित शाळेत धक्कादायक प्रकार उघडकीस आला आहे. एका १३ वर्षीय विद्यार्थिनीचा विनयभंग केल्याप्रकरणी आणि एका विद्यार्थ्याला मारहाण केल्याप्रकरणी शाळेतील पीटी शिक्षक अमिर खान याला सानपाडा पोलिसांनी अटक केली आहे.
या घटनेतील अमिर खान हा शिक्षक सानपाडा येथील एका नामांकित शाळेमध्ये पीटी शिक्षक म्हणून कार्यरत आहे. या शिक्षकाने ऑगस्ट २०२५ मध्ये एका १३ वर्षीय विद्यार्थ्याला मारहाण केली होती. या विद्यार्थ्याने शिक्षकाचा मेसेज संबंधित पीडित मुलीला दिला नव्हता, या रागातून शिक्षकाने विद्यार्थ्याला मारहाण केली होती. त्यानंतर या शिक्षकाने ४ डिसेंबरला सकाळी शाळा भरत असताना ७ वीच्या वर्गातील पीडित विद्यार्थिनीच्या गालावर जबरदस्तीने मुका घेऊन तिचा विनयभंग केला होता. तसेच याबाबत कुणालाही काही सांगू नकोस, अशी धमकीही त्याने मुलीला दिली होती. या प्रकारानंतर शिक्षकाने पीडित मुलीचा सतत पाठलाग करून तिला मानसिक त्रास देण्यास सुरुवात केली होती.
घाबरलेल्या पीडित मुलीने हा सर्व प्रकार आपल्या पालकांना सांगितला. त्यानंतर पालकांनी तत्काळ सानपाडा पोलिस ठाण्यात धाव घेऊन तक्रार दाखल केली. या घटनेचे गांभीर्य ओळखून पोलिसांनी अमिर खान याच्या विरोधात पोक्सो कायद्याच्या विविध कलमान्वये गुन्हा दाखल केला आहे. मुलीच्या पालकांनी दिलेल्या तक्रारीनुसार गुन्हा दाखल करुन शिक्षकाला अटक केली आहे. या प्रकरणाचा अधिक तपास सुरू असून, शाळेतील सीसीटीव्ही फुटेज आणि इतर पुरावे गोळा केले जात आहेत, अशी माहिती पोलिसांनी दिली.