तिकिटासाठी वरिष्ठांची मनधरणी
उमेदवारी अर्ज देण्यास पालिकेकडून सुरुवात
वसई, ता. २३ (बातमीदार)ः वसई-विरार शहर महापालिका सार्वत्रिक निवडणुकीचे बिगुल वाजले आहे. महापालिका प्रशासनाने बुधवारपासून (ता. २३) उमेदवारी अर्ज देण्यास सुरुवात केली आहे. मात्र तिकीट वाटपाचा निर्णय झाला नसल्याने प्रस्थापितांसह इच्छुकांकडून मनधरणी सुरू आहे.
वसई-विरार महापालिकेची पाच वर्षे उलटून गेल्यावर निवडणूक लागली आहे. २९ प्रभागांत ११५ सदस्य असणार आहेत. महापालिका निवडणूक विभागाकडून कामकाज सुरू झाले आहे. महायुती विरुद्ध बहुजन विकास आघाडी अशी थेट लढत पाहावयास मिळणार आहे. अशातच भाजपमध्ये बहुजन विकास आघाडीचे अनेक कार्यकर्ते, माजी नगरसेवक पक्ष प्रवेश करीत आहेत. भाजपचे जुने कार्यकर्ते मात्र तिकीट मिळेल, अशी आशा लावून बसले आहेत.
------------------------
इच्छुक सक्रिय
तिकिटाची घोषणा झाली नसली तरी इच्छुक प्रभाग पिंजू लागले आहेत. मतदार याद्यांचा अभ्यास करीत आहेत. तसेच समाजमाध्यमांवर सक्रिय झाले आहेत. कार्यकर्ते, मतदारांच्या भेटीतून शक्तिप्रदर्शन केले जात आहे. पण पक्षश्रेष्ठी कोणावर मर्जी दाखवणार, यावर पुढचे भवितव्य ठरणार आहे.