गुन्हेगारी पार्श्वभूमीच्या मयूर शिंदेचा भाजपमध्ये प्रवेश
सकाळ वृत्तसेवा
ठाणे, ता. २३ : गुन्हेगारी पार्श्वभूमी असलेल्या मयूर शिंदे याचा भाजपच्या ठाणे विभागीय कार्यालयात आमदार संजय केळकर, आमदार निरंजन डावखरे आणि ठाणे जिल्हाध्यक्ष संदीप लेले यांच्या उपस्थितीत मंगळवारी अधिकृत पक्षप्रवेश झाला.
२०१७ मध्ये त्याने शिवसेनेकडून उमेदवारी मागितली होती. मात्र, त्याला उमेदवारी मिळाली नाही. त्यानंतर त्याने भाजप आणि नंतर राष्ट्रवादी काँग्रेस पक्षात प्रवेश केला होता. यंदा पुन्हा निवडणूक लढविण्याच्या तयारीत असताना त्याने भाजपमध्ये प्रवेश करण्याचा निर्णय घेतला. या पक्षप्रवेशासाठी सुरुवातीला मोठ्या कार्यक्रमाचे आयोजन करण्यात आले होते. भाजपचे प्रदेशाध्यक्ष रवींद्र चव्हाण यांच्या उपस्थितीत हा कार्यक्रम होणार होता. मात्र, वरिष्ठ नेते उपस्थित न राहिल्याने आणि आचारसंहिता जाहीर झाल्याने तो कार्यक्रम रद्द करण्यात आल्याचे सांगण्यात आले होते. या पार्श्वभूमीवर पक्षप्रवेशाबाबत विविध स्तरांवर चर्चा आणि टीका झाली होती.