मुंब्र्यात सहा गाळे जळून खाक
पुठ्ठ्याच्या गोडाऊनला आग
सकाळ वृत्तसेवा
ठाणे, ता. २३ : मुंब्रा अग्निशमन केंद्राजवळील मेघ कंपनी कंपाउंड या ठिकाणी बी विंगमध्ये पहिल्या व दुसऱ्या मजल्यावरील पुठ्ठ्याच्या गोडाऊनला मंगळवारी सायंकाळी आग लागली. या आगीवर जवळपास दोन ते अडीच तासांनी नियंत्रण मिळविण्यात यश आले. या घटनेत कोणालाही दुखापत झाली नसली तरी, सहा गाळे जळून खाक झाल्याची माहिती ठाणे महापालिका आपत्ती व्यवस्थापन कक्षेने दिली.
मुंब्र्यातील मेघ कंपनी कंपाउंड, बी विंगमध्ये पहिल्या आणि दुसऱ्या मजल्यावर पुठ्ठ्याच्या गोडाऊनला आग लागली. आगीने काही क्षणात भीषण रूप धारण केले. या घटनेची माहिती मिळताच घटनास्थळी ठाणे महापालिका आपत्ती व्यवस्थापन अधिकारी-कर्मचारी, अग्निशमन दलाच्या जवानांनी आणि मुंब्रा पोलिसांनी धाव घेतली. तातडीने अग्निशमन दलाच्या जवानांनी आगीवर नियंत्रण मिळविण्यासाठी शर्थीचे प्रयत्न सुरू केले. त्यानंतर त्या आगीवर जवळपास दोन ते अडीच तासांनी संपूर्णपणे नियंत्रण मिळविण्यात यश आले.